Futbol üzrə Çempionlar Liqasında daha 3 qrupda 6 oyun keçirilib.
Sportnet.az-ın məlumatına görə, Türkiyənin yeganə təmsilçisi "Qalatasaray" doğma "Türk Telekom" stadionunda Rusiya çempionu "Lokomotiv"i darmadağın edib - 3:0. Hesabı 9-cu dəqiqədə Qari Rodriges açıb. 67-ci dəqiqədə Eren Derdiyok fərqi artırıb. 87-ci dəqiqədə Papa Ndiaye qırmızı vərəqə alaraq, "sarı-qırmızılar"ı azlıqda qoyub. Bununla belə, "Cim-Bom" 90+3-cü dəqiqədə penalti qazanıb. Nəticədə Selçuk İnan dəqiq zərbə vuraraq, yekun nöqtəni qoyub. Beləliklə, "Qalatasaray" Fatih Terimin rəhbərliyi altında 5 ildən sonra çıxdığı Çempionlar Liqası matçını böyük hesablı qələbə ilə başa vurub.
D qrupunun digər oyununda "Şalke" Almaniyada Portuqaliya "Portu"su ilə 1:1 hesablı heç-heçə edib. Bu nəticələrdən sonra "Qalatasaray" 3 xalla vahid lider olub.
Günün mərkəzi qarşılaşması C qrupuna təsadüf edib. İngiltərədə "Liverpul" Fransa PSJ-si ilə görüşdə son dəqiqə qolu ilə qələbə qazanıb - 3:2. Qrupun digər görüşündə "Srvena Zvezda" Serbiyada İtaliya "Napoli"si ilə qolsuz heç-heçə edib.
A qrupunda Avropa Liqasının son qalibi İspaniya "Atletiko"su səfərdə "Monako"nu 2:1, Almaniyanın "Borussiya" (Dortmund) komandası isə Belçikada "Brügge"ni 1:0 hesabı ilə yenməyi bacarıb.
Qeyd edək ki, daha əvvəl B qrupunda "Barselona" İspaniyada Hollandiya PSV-sini 4:0, "İnter" İtaliyada İngiltərə "Tottenhem"ini 2:1 hesabı ilə məğlub edib.
--------------------------
Futbol üzrə Çempionlar Liqasında qrup mərhələsinə start verilib.
Sportnet.az xəbər verir ki, ilk iki görüş B qrupuna təsadüf edib. İspaniya "Barselona"sı "Kamp Nou"da Hollandiya PSV-sini qəbul edib. Görüş meydan sahiblərinin böyük hesablı qələbəsi ilə yekunlaşıb - 4:0. Qollardan 3-nü 32, 77 və 87-ci dəqiqələrdə Lionel Messi, digərini 75-ci dəqiqədə Usman Dembele vurub. Kataloniya komandası 79-cu dəqiqədə Samüel Yumtitinin qırmızı vərəqə alması səbəbindən oyunu azlıqda başa vurub.
Qrupun digər oyununda "İnter" İtaliyada İngiltərə "Tottenhem"i üzərində əzmkar qələbə qazanıb. Hesabı 53-cü dəqiqədə qonaq komandadan Kristian Eriksen açsa da, 86-cı dəqiqədə Mauro İkardi, 90+2-ci dəqiqədə isə Matias Vesino fərqlənib.
Bu nəticələrdən sonra "Barselona" və "İnter" hərəyə 3 xalla qrupda ilk 2 yeri bölüşür. Sonrakı yerlərdə olan "Tottenhem" və PSV isə xalsızdır.
--------------------------------
Bu gün UEFA Çempionlar Liqasında qrup mərhələsinin oyunlarına start veriləcək.
Sportnet.az xəbər verir ki, qitənin ən nüfuzlu klub turnirində 8 qrupda qərarlaşan 32 komanda növbəti mərhələyə vəsiqə qazanmaq üçün mübarizə aparacaq.
Türkiyənin yeganə təmsilçisi "Qalatasaray" 15-ci mövsümünü keçirəcək. "Sarı-qırmızılar"ın ilk turda rəqibi Rusiya çempionu "Lokomotiv" (Moskva) olacaq. İstanbuldakı "Türk Telekom" stadionunda təşkil olunacaq görüşü Canluka Rokkinin rəhbərliyi ilə italiyalı hakimlər briqadası idarə edəcək.
Çempionlar Liqasının finalçısı İngiltərənin "Liverpul" komandası Fransa PSJ-sini qəbul edəcək. Avropa Liqasının son qalibi İspaniya "Atletiko"su isə "Monako"nun qonağı olacaq.
Çempionlar Liqası, I tur
18 sentyabr
A qrupu
23:00. "Monako" (Fransa) - "Atletiko" (Madrid, İspaniya) - 1:2
Qol: Samüel Qransir, 18 - Dieqo Kosta, 32. Xose Ximenes, 45+1
23:00. "Brügge" (Belçika) - "Borussiya" (Dortmund, Almaniya) - 0:1
Qol: Kristian Pulişiç, 85
B qrupu
20:55. "İnter" (İtaliya) - "Tottenhem" (İngiltərə) - 2:1
Qollar: Mauro İkardi, 86. Matias Vesino, 90+2 - Kristian Eriksen, 53
20:55. "Barselona" (İspaniya) - PSV (Eyndhoven, Hollandiya) - 4:0
Qol: Lionel Messi, 32; 77; 87. Usman Dembele, 75
Qırmızı vərəqə: Samüel Yumtiti, 79 ("Barselona")
C qrupu
23:00. "Srvena Zvezda" (Serbiya) - "Napoli" (İtaliya) - 0:0
23:00. "Liverpul" (İngiltərə) - PSJ (Fransa) - 3:2
Qollar: Daniel Starric, 30. Ceyms Milner 36 (pen.). Roberto Firmino, 90+2 - Tomas Mönyö, 40. Kilian Mbappe, 83
D qrupu
23:00. "Şalke" (Almaniya) - "Portu" (Portuqaliya) - 1:1
Qollar: Bril Embolo, 64 - Otavio, 75 (pen.)
Dəqiq yerinə yetirilməyən penalti: Aleks Telles, 13 ("Portu")
23:00. "Qalatasaray" (Türkiyə) - "Lokomotiv" (Moskva, Rusiya) - 3:0
Qollar: Qarri Rodriges, 9. Eren Derdiyok, 67. Selçuk İnan, 90+4 (pen.)
Qırmızı vərəqə: Papa Ndiaye, 87 ("Qalatasaray")
Qeyd edək ki, 2018-2019 mövsümündə Çempionlar Liqasının finalı İspaniyanın paytaxtı Madriddəki "Vanda Metropolitano" stadionunda təşkil olunacaq.
