"Yaxşı oyun göstərdik. Baxmayarıq ki, rəqib bizə təzyiq göstərirdi, bacardıqca topu özümüzdə saxlayıb oyuna nəzarət etdik. 2 qol vurub qələbə qazandıq. Rəqib komandanın qapıçısının da yaxşı oynadığını düşünürəm".
Sportnet.az xəbər verir ki, bunu "Qarabağ"ın qapıçısı Hannes Halldorsson evdə "Sumqayıt"a 2:0 hesabı ilə qalib gəldikləri Topaz Premyer Liqasının X tur matçından sonra keçirdiyi brifinqdə deyib. İslandiyalı qolkiper bildirib ki, Azərbaycan komandasına keçməyindən peşman deyil: "İkinci dəfə də imkanım olsaydı, yenə "Qarabağ"a gəlməyi seçərdim. Düzdür, son həftələrdə oynamamışam, amma məşqlərdə daha gərgin çalışıb daha çox oyunda iştirak edəcəyəm. Bu gün qələbə qazandığımız üçün xoşbəxtəm".
Halldorsson "Vorskla" ilə Ukraynada keçirəcəkləri Avropa Liqasının IV tur matçına qələbə üçün yollanacaqlarını da əlavə edib: "Düşünürəm ki, 3 xalı qazanacaq gücdəyik".
