Avropa Liqasının qrup mərhələsində "Qarabağ"ın rəqiblərindən olan "Sportinq" klubu Portuqaliya Primeyrasında X turun oyununu keçirib.
Sportnet.az xəbər verir ki, Lissabon təmsilçisi "Şaviş"i qəbul edib. Görüş meydan sahiblərinin 2:1 hesablı qələbəsi ilə yekunlaşıb. Hesabı 23-cü dəqiqədə meydan sahiblərinin hollandiyalı hücumçusu Bas Dost açıb. 71-ci dəqiqədə Bruno Qallo qırmızı vərəqə alaraq, qonaqları azlıqda qoyub. Lakin cəmi 10 dəqiqə sonra Niltinyo bərabərlik qolunu vurub. Bununla belə, 85-ci dəqiqədə Bas Dost penaltidən yararlanaraq, yekun nəticəni müəyyənləşdirib.
Bu qələbə sayəsində xallarını 22-yə çatdıran "Sportinq" ikinci pilləyə yüksəlib. "Şaviş" isə 7 xalla sonuncu - 18-ci pillədə qərarlaşıb.
Qeyd edək ki, "Sportinq" "Qarabağ"la ilk görüşünü sentyabrın 20-də Lissabonda keçirib və 2:0 hesabı ilə qalib gəlib. Bakıdakı qarşılaşma noyabrın 29-da keçiriləcək.
