Topaz Premyer Liqasında XIII tura yekun vurulub.
Sportnet.az xəbər verir ki, turun son oyununda "Qarabağ" "Keşlə"ni qəbul edib. Qarşılaşma Ağdam təmsilçisinin 5:1 hesablı qələbəsi ilə yekunlaşıb.
"Qarabağ"ın 3 qolunu Mahir Mədətov vurub. 21 yaşlı hücumçu oyunun 6, 53 və 78-ci dəqiqələrdə fərqlənməklə het-trik edib. Komandanın digər qollarını isə 50-ci dəqiqədə Filip Ozobiç və 55-ci dəqiqədə Abdullah Zubir vurub. "Keşlə"nin yeganə qoluna isə 21-ci dəqiqədə Slavik Alxasov imza atıb.
Turnir cədvəlində ikinci pillədə qərarlaşan son ölkə çempionu bu qələbədən sonra xallarının sayını 27-ə çatdırıb. "Keşlə" isə 9 xalla sonuncu - səkkizinci pillədə qərarlaşıb.
Qeyd edək ki, günün digər matçında "Qəbələ" evdə "Zirə" ilə heç-heçə edib - 0:0. Dekabrın 1-də keçirilmiş oyunlarda "Neftçi" səfərdə "Sabah"a 2:1, "Sumqayıt" isə evdə "Səbail"ə 1:0 hesabı ilə qalib gəlib.
-------------------------------------
Topaz Premyer Liqasının XIII turunda daha bir qarşılaşma keçirilib.
Sportnet.az xəbər verir ki, ötən gündən təxirə salınmış "Qəbələ" - "Zirə" matçında hesab açılmayıb. Qəbələ şəhər stadionundakı görüş 57-ci dəqiqədən etibarən start götürüb.
61-ci dəqiqədə qonaqların futbolçusu Bilal Həmdi qırmızı vərəqə alaraq meydandan qovulub.
Bu nəticədən sonra əyalət təmsilçisi xallarının sayını 16-ya yüksəldib və 5-ci pillədə qalıb. 10-cu xalını qazanan "Zirə" isə hələlik, 7-ci sıraya yüksəlib.
Qeyd edək ki, dekabrın 1-də keçirilmiş matçda "Neftçi" səfərdə "Sabah"a 2:1, "Sumqayıt" isə evdə "Səbail"ə 1:0 hesabı ilə qalib gəlib. Tura bu gün keçiriləcək "Qarabağ" - "Keşlə" matçı ilə yekun vurulacaq.
----------------------------------------------------
Bu gün Topaz Premyer Liqasında XIII tura yekun vurulacaq.
Sportnet.az xəbər verir ki, əvvəlcə ötən gündən təxirə salınmış "Qəbələ" - "Zirə" matçı 57-ci dəqiqədən qaldığı yerdən davam etdiriləcək. Bu görüş qatı dumanın Qəbələ şəhər stadionunda oyunun keçirilməsinə mane olması səbəbindən yarımçıq qalıb. Həmin vaxt hesab heç-heçə olub - 0:0.
Günün digər oyunu Tofiq Bəhramov adına Respublika stadionunda "Qarabağ" və "Keşlə" komandaları arasında keçiriləcək. Bu qarşılaşma da əslində bir gün əvvəl oynanılmalı idi. Lakin Ağdam komandasının baş məşqçisi Qurban Qurbanov milli komandanın rəhbəri kimi İrlandiyanın paytaxtı Dublində 2020-ci il Avropa çempionatının püşkatma mərasimində olduğundan, görüş bir gün ertələnib.
Hazırda lider "Neftçi"dən 8 xal geridə qalan "Qarabağ" 24 xalla 2-ci pillədə qərarlaşıb. "Keşlə" isə 9 xalla 7-cidir. İki komanda arasında əvvəlki 56 matçın 24-dən Ağdam, 13-dən paytaxt təmsilçisi qələbə ilə ayrılıb, 19 oyunda heç-heçə qeydə alınıb. Topların nisbəti "Qarabağ"ın xeyrinədir - 62:37. İki komanda arasında oyunlarda 99 qol vurulub ki, növbəti top 100-cü olacaq. "Qarabağ” 3 oyundur qələbə qazana bilmir. Bu klubun son 8 ev matçında 2-dən artıq qol vurulmur.
Topaz Premyer Liqası, XIII tur
3 dekabr (bazar ertəsi)
13:00. "Qəbələ” – "Zirə” - 0:0
Qırmızı vərəqə, Bilal Həmdi, 61
Hakimlər: Vüqar Həsənli, Namiq Hüseynov, Cəmil Quliyev, Rövşən Rəcəbov
Hakim-inspektor: Asim Xudiyev
AFFA nümayəndəsi: Namiq Məstanov
Qəbələ şəhər stadionu
19:00. "Qarabağ” – "Keşlə” - 5:1
Qol: Mahir Mədətov, 6. 53. 78 Filip Ozobiç, 50. Abdullah Zubir, 55 - Slavik Alxasov, 21
Hakimlər: Alik Yunusov, Mübariz Haşımov, Rahil Ramazanov, Ramiz Məhərrəmov
Hakim-inspektor: Fazil Mürşüdov
AFFA nümayəndəsi: Əsgər Əmirəliyev
Tofiq Bəhramov adına Respublika stadionu
Qeyd edək ki, ilk oyun günündə "Neftçi" səfərdə "Sabah"a, "Sumqayıt" evdə "Səbail"ə qalib gəlib.
-----------
Bu gün Topaz Premyer Liqasında XIII turun daha bir oyunu keçiriləcək.
Sportnet.az xəbər verir ki, Qəbələ şəhər stadionunda eyniadlı komanda autsayder "Zirə" ilə üz-üzə gələcək. Hər iki komanda bu mövsüm qeyri-sabit çıxış edir. Samir Abasovun baş məşqçi olduğu kollektiv ilk qələbəsini I dövrənin son turunda məhz "qırmızı-qaralar" üzərində qazanıb - 1:0. Həmin məğlubiyyətdən sonra komandadan getmək istəyən baş məşqçi Sənan Qurbanovun istefası qəbul olunmayıb. Artıq nəticələrini nisbətən yaxşılaşdıran əyalət təmsilçisi bu gün qalib gəlsə, xallarını 18-ə çatdıraraq, 4-cü pilləyə yüksələcək. 9 xala malik "Zirə" isə xal əldə edə bilsə, ən azı bir günlük sonuncu pilləni tərk edəcək.
Bu komandalar arasında indiyədək keçirilmiş 13 görüşdə tərəflər hərəyə 4 qələbə qazanıblar. 5 oyunda isə heç-heçə qeydə alınıb. Topların nisbəti isə "Qəbələ"nin xeyrinədir - 15:12. "Zirə” 7 matçdır meydanı qolsuz tərk etmir. Son 8 qarşılaşmada meydan sahibi olan tərəf uduzmur.
Topaz Premyer Liqası, XIII tur
2 dekabr (bazar)
13:00. "Qəbələ” – "Zirə” - 0:0 (oyun 59-cu dəqiqədən davam etdiriləcək)
Hakimlər: Vüqar Həsənli, Namiq Hüseynov, Cəmil Quliyev, Rövşən Rəcəbov
Hakim-inspektor: Asim Xudiyev
AFFA nümayəndəsi: Namiq Məstanov
Qəbələ şəhər stadionu
Qeyd edək ki, ilk oyun günündə "Neftçi" səfərdə "Sabah"a, "Sumqayıt" evdə "Səbail"ə qalib gəlib.Tura dekabrın 3-də "Qarabağ" - "Keşlə" matçı ilə yekun vurulacaq.
