Futbol üzrə Azərbaycan Premyer Liqasında XXI turun son oyunu keçirilib.
Sportnet.az-ın məlumatına görə, "Neftçi" "Bakcell Arena"da "Qəbələ"ni qəbul edib. Qarşılaşmada qalib müəyyənləşməyib - 1:1.
İlk hissədə "Neftçi"nin hücumları olsa da hesabı açmaq mümkün olmayıb. İkinci hissəyə sürətli başlayan flaqman matçın 54-cü dəqiqəsində hesabda önə keçib. "Neftçi"nin müdafiəçisi Mamadu Mbocun qüvvətli zərbəsindən sonra Amin Seydiyevə toxunan top istiqamətini dəyişib və qapıya daxil olub. Amma qol Mbocun aktivinə yazılıb.
Matçın 73-cü dəqiqəsində Stiven Monroz müdafiəçilərin diqqətindən yayınaraq topu qapıya göndərib və hesabı bərabərləşdirib.
Bu heç-heçə sayəsində xallarının sayını 45-ə çatdıran "Neftçi" liderliyini davam etdirsə də, ikinci yerdəki "Qarabağ"la eyni xala malikdir. "Qəbələ" isə 29-cu xalını qazanıb və 4-cü pillədəki yerini möhkəmləndirib.
Qeyd edək ki, turun digər oyunlarında "Qarabağ" "Səbail"i 2:1, "Zirə" "Keşlə"ni 2:0 hesabı ilə məğlub edib. "Sabah" - "Sumqayıt" matçında isə qalib müəyyənləşməyib - 1:1.
----------------------------------------------
Azərbaycan Premyer Liqasında XXI turun daha bir oyunu keçirilib. Sportnet.az-ın məlumatına görə, "Səbail" Bayıl stadionunda "Qarabağ"ı qəbul edib. Görüş qonaqların 2:1 hesablı qələbəsi ilə yekunlaşıb.
Hesabı 34-cü dəqiqədə cərimə zərbəsi ilə "Qarabağ"ın ispaniyalı yarımmüdafiəçisi Dani Kintana açıb. 42-ci dəqiqədə "Səbail"in hücumçusu Ağabala Ramazanov bərabərlik qolunu vurub. Oyunda son nöqtəni 77-ci dəqiqədə Riçard Almeyda qoyub. O, Elvin Yunuszadənin əlinə dəyən topa görə təyin olunmuş penaltini dəqiq yerinə yetirib.
Görüşü AFFA-nın baş katibi Elxan Məmmədov və "Səbail" rəhbərliyi ilə yanaşı, klubla müqavilə imzalayacağı gözlənilən Maykl Essyen də izləyib.
"Qarabağ"la vida matçının iştirak ərizəsində yer alan albaniyalı müdafiəçi Ansi Aqolli isə sonadək ehtiyatda qalıb.
Bu nəticədən sonra xallarını 45-ə çatdıran "Qarabağ" liderliyə yüksəlib. "Səbail" isə 31 xalla 3-cü pillədə qalıb.
---------
Futbol üzrə Azərbaycan Premyer Liqasında XXI tura start verilib.
Sportnet.az xəbər verir ki, eyni saatda iki oyun başlayıb. "Sabah" "Sumqayıt"ı, "Zirə" isə "Keşlə"ni qəbul edib.
Masazırda baş tutan matçda qalib müəyyənləşməyib - 1:1. Meydan sahiblərinin heyətində 28-ci dəqiqədə Marko Deviç ikinci sarı vərəqədən sonra meydanda qovulub. Bundan 3 dəqiqədə sonra isə "Sabah"ın heyətində kapitan Cavid İmamverdiyev penaltidən yararlana bilməyib. Onun zərbəsi qapı dirəyinə tuş gəlib.
Görüşün 40-cı dəqiqəsində Elvin Məmmədovun sumqayıtlıları önə çıxarıb. 77-ci dəqiqədə Rəşad Eyubov hesabı bərabərləşdirib.
"Zirə" isə "Keşlə"ni məğlub edib - 2:0. Meydan sahiblərinin heyətində Xulio Sezar Rodriqez 53-cü dəqiqədə penaltidən yararlana bilməyib. Buna baxmayaraq, hücumçu 68 və 79-cu dəqiqələrdə fərqlənməklə komandasına qələbə qazandırıb.
Bu nəticələrdən sonra xalını 22-yə çatdıran "Zirə" "Sabah"la 5-6-cı pillələri bölüşür. "Keşlə" 19 xalla 7-ci, "Sumqayıt" 17 xalla 8-ci yerdədir.
Qeyd edək ki, tura saat 16:45-də start götürən "Səbail" - "Qarabağ" və 19:00-da başlayacaq "Neftçi" - "Qəbələ" oyunları ilə yekun vurulacaq.
-----------------------------------------
Bu gün Azərbaycan Premyer Liqasında XXI turun oyunları keçiriləcək.
Sportnet.az xəbər verir ki, milli komandanın təlim-məşq toplanışı ilə əlaqədar üçüncü dövrənin son tur qarşılaşmalarının hamısı eyni gündə baş tutacaq.
.
Çempionatın debütantı "Sabah" "Əlincə Arena"da "Sumqayıt"ı qəbul edəcək. Paytaxt komandası 21 xalla 5-ci, "gənclik şəhəri" təmsilçisi isə 16 xalla sonuncu - 8-ci yerdədir. Son matçlarda qələbə qazana bilməyən hər iki kollektiv uğursuz çıxışa son verməyə çalışacaq. Komandalar Premyer Liqada yalnız cari mövsümdə üz-üzə gəliblər. "Sumqayıt" ilk dövrədə rəqibini 4:1 hesabı ilə üstələyib. "Sabah" isə ikinci dövrədə minimal hesablı qələbə qazanıb - 1:0. Ötən tur evdə "Neftçi"yə 1:2 hesabı ilə uduzduqları oyunda qırmızı vərəqə alan və üç oyunluq cəzalanan "Sumqayıt"ın qapıçısı Mehdi Cənnətov bu matçda iştirak etməyəcək. Baş məşqçi Ayxan Abbasov isə cəzalı olduğu üçün komandaya təlimatlarını texniki zonadan verə bilməyəcək.
Bu oyunla eyni saatda başlayacaq görüşdə "Zirə" "Keşlə"ni qəbul edəcək. Hazırda paytaxt klublarının 19 xalı var və onlar 6-7-ci yerləri bölüşdürür. Matç komandaların çempionatdakı 15-ci qarşılaşması olacaq. 14 matçın 4-də qonaqlar, 2-də isə meydan sahibləri qələbə qazanıb. 8 görüşdə qalib müəyyənləşməyib. Topların fərqində də "Keşlə"nn üstünlüyü var - 14:12. "Keşlə" həmçinin rəqibinə qarşı keçirdiyi son 4 oyunda meydanı qolsuz tərk etməyib. "Zirə" isə "Keşlə" ilə keçirdiyi son 5 ev oyununda qalib gələ bilməyib. İlk dövrədəki matç heç-heçə yekunlaşıb - 2:2. İkinc dövrədə isə "Keşlə" rəqibini minimal hesabla məğlub edib 1:0.
Turun digər iki oyunu da paytaxtda baş tutacaq. "Səbail" "Bayıl Arena"da çempionluğa iddialı "Qarabağ"dan xal almağa çalışacaq. Ağdam təmsilçisi hazırda 42 xalla ikinci, "Səbail" isə 31 xalla üçüncü yerdədir. Son ölkə çempionu texniki nəticənin qeydə alındığı matçdan başqa bütün oyunlarda paytaxt təmsilçisini məğlubiyyətə uğradıb. "Səbail" Premyer Liqada "Qarabağ"a qarşı keçirdiyi 6 oyunun heç birində qol vura bilməyib, əvəzində qapısında 7 top görüb. Bu həm də albaniyalı müdafiəçi Ansi Aqollinin "Qarabağ"ın heyətində vida matçı olacaq.
XXI tura mərkəzi oyunla yekun vurulacaq. 44 xalla turnir cədvəlinin ilk pilləsində qərarlaşan "Neftçi" 28 xalla 4-cü sırada gedən "Qəbələ"ni "Bakcell Arena"da qəbul edəcək. Flaqman əyalət təmsilçisinə qarşı keçirdiyi son 7 çempionat oyununda meydanı qolsuz tərk etməyib. "Qəbələ" isə son 2 səfər oyununda məğlub olub. İlk dövrədə "Neftçi" evdə 2:1 hesablı qələbə qazanıb, ikinci dövrədə isə bölgə klubu üç xalı aktivinə yazdırıb - 3:1. "Neftçi"də Baqali Dabo, "Qəbələ"də isə Bəhlul Mustafazadə cəza səbəbindən bu oyunu buraxacaq.
Azərbaycan Premyer Liqası, XXI tur
15 mart (cümə)
16:00. “Sabah” – “Sumqayıt” - 1:1
Qollar: Rəşad Eyubov, 77 Elvin Məmmədov, 39
Qırmızı vərəqə: Marko Deviç, 28 ("Sabah", ikinci sarı)
İstifadə olunmamış penalti: Cavid İmamverdiyev, 31 ("Sabah", dirək)
Hakimlər: Orxan Məmmədov, Knyaz Əmiraslanov, Cavanşir Yusifov, Vüqar Həsənli
Hakim-inspektor: Asim Xudiyev
AFFA nümayəndəsi: Maşallah Əhmədov
“Əlincə Arena”
I dövrə - 1:4, II dövrə - 1:0
16:00. “Zirə” – “Keşlə” - 2:0
Qollar: Xulio Sezar Rodrigez, 68; 79
Qeyri-dəqiq penalti: Xulio Sezar Rodrigez, 53
Hakimlər: Rəvan Həmzəzadə, Vüqar Bayramov, Əli Cəbrayılov, Rauf Allahverdiyev
Hakim-inspektor: Feyzulla Feyzullayev
AFFA nümayəndəsi:Əliyev İlham
Zirə İdman Kompleksinin stadionu,(pfl.az/canlı)
I dövrə - 2:2, II dövrə - 0:1
16:45. “Səbail” – “Qarabağ” - 1:2
Qollar: Ağabala Ramazanov, 42 - Dani Kintana, 34. Riçard Almeyda, 77 (pen.)
Hakimlər: Əliyar Ağayev, Akif Əmirəli, Namiq Hüseynov, Rəhim Həsənov
Hakim-inspektor: Vüsal Əliyev
AFFA nümayəndəsi: Nihad Məmmədov
“Bayıl Arena”, (CBC Sport/canlı)
I dövrə - 0:2, II dövrə - 3:0 (texniki məğlubiyyət)
19:00. “Neftçi” – “Qəbələ” - 1:1
Qollar: Mamadu Mboc, 54 - Stiven Monroz, 73
Hakimlər: Səbuhi Bayramov, Yaşar Abbasov, Müslüm Əliyev, Etibar Həsənov
Hakim-inspektor: Anar Salmanov
AFFA nümayəndəsi: Seymur Səlimli
“Bakcell Arena” (CBC Sport/canlı)
İlk dövrə - 2:1, II dövrə - 1:3
