Futbol üzrə Azərbaycan Premyer Liqasında XXII turun son oyunu keçirilib.
Sportnet.az xəbər verir ki, autsayder "Sumqayıt" "Kapital Bank Arena"da son 5 mövsümün çempionu "Qarabağ"ı qəbul edib.
Görüşdən əvvəl hər iki komandanın ifasında Aprel döyüşlərinin üçüncü ildönümü münasibətilə tədbir təşkil olunub. Lakin görüş heç də dostcasına keçməyib. "Qarabağ" hər hissədə 3 top vuraraq 6:0 hesabı ilə qalib gəlib.
Hesabı 17-ci dəqiqədə Dani Kintana açıb. 20 və 40-cı dəqiqələrdə Mahir Mədətov fərqlənərək "dubl" edib.
Darmadağına 50-ci dəqiqədə Filip Ozobiç qoşulub. Oyunda son sözü isə 78 və 84-cü dəqiqələrdə Abdullah Zubir deyib.
Bu qələbə sayəsində xallarını 48-ə çatdıran "Qarabağ" "Neftçi"nin liderliyinə şərik olub. "Sumqayıt" isə 17 xalla 8-ci pillədə qalıb.
Qeyd edək ki, turun digər görüşlərində "Səbail" səfərdə "Zirə"ni 2:1, "Neftçi" "Keşlə"ni 1:0 hesabı ilə məğlub edib. "Qəbələ" - "Sabah" matçında isə hesab açılmayıb.
---------------------------------------
Futbol üzrə Azərbaycan Premyer Liqasında XXII turun daha bir oyunu keçirilib.
Sportnet.az-ın məlumatına görə, "Qəbələ" doğma meydanda debütant "Sabah"la üz-üzə gəlib. Rauf Cabbarovun idarə etdiyi qarşılaşma qolsuz bərabərliklə yekunlaşıb. Qonaq komandanın heyətində Kərim Diniyev 90+1-ci dəqiqədə ikinci sarı vərəqəni alaraq komandasını azlıqda qoyub.
Bu nəticədən sonra 30-cu xalını qazanan əyalət təmsilçisi üçüncü yerdəki "Səbail"dən 4 xal geri qalır. "Sabah" isə 23 xalla beşincidir.
Qeyd edək ki, XXII turun açılış matçında "Səbail" səfərdə "Zirə"ni məğlub edib - 2:1, "Neftçi" isə "Keşlə"ni üstələyib - 1:0. Tura bu gün keçiriləcək "Sumqayıt" - "Qarabağ" oyunu ilə yekun vurulacaq. Qarşılaşma saat 18:30-da başlayacaq.
-------------------------------------------------
Bu gün Azərbaycan Premyer Liqasında XXII turun son 2 matçı keçiriləcək. Sportnet.az xəbər verir ki, 31 mart - Azərbaycanlıların Soyqırımı günü ilə əlaqədar turun ikinci oyun günü məhz aprelin 1-nə təsadüf edib.
İlk görüşlər paytaxtda təşkil olunmuşdusa, bu dəfə komandalar Bakıdan kənarda meydana çıxacaqlar. Əvvəlcə "Qəbələ" debütant "Sabah"ı qəbul edəcək. Hazırda "qırmızı-qaralar" 29 xalla 4-cü, "göy-ağlar" 22 xalla 5-ci pillədədir. Bu matçın nəticəsi komandaların turnir cədvəlindəki vəziyyətinə təsir etməyəcək. Əvəzində avrokuboklara vəsiqə şansı verən 3-4-cü yerlər uğrunda mübarizədə intriqanın ölməməsi baxımından, qarşılaşma ciddi əhəmiyyətə malikdir. "Qəbələ" mütləq qalib gəlməlidir ki, 3-cü pillədəki "Səbail"lə xal fərqini yenə 2-yə endirsin. "Sabah"a isə qələbə təqdirində "qırmızı-qaralar"a çatmağa daha 4 xal lazım gələcək.
Bu mövsüm iki komanda 3 dəfə Premyer Liqada, 2 dəfə Azərbaycan Kubokunun 1/4 final mərhələsində üz-üzə gəlib. Çempionatın ilk dövrəsində bakılılar üstün olubsa, qalan 4 oyunda əyalət komandası qalib ayrılıb. "Qəbələ"nin Premyer Liqa meydanındakı yeganə matçda hər iki komanda qol vurub. Topların nisbətində isə "qırmızı-qaralar" üstündür - 3:2.
Turun son matçında isə autsayder "Sumqayıt" "Kapital Bank Arena"da son 5 mövsümün çempionu "Qarabağ"la qarşılaşacaq. Hazırda "gənclik şəhəri" təmsilçisi 17 xalla 8-ci pillədədir. Bu komanda qalib gəlsə, turnir cədvəlində bir pillə irəliləyəcək. 45 xala malik "Qarabağ"a isə qələbə mütləq lazımdır ki, lider "Neftçi" ilə xal fərqində yenidən bərabərləşdirsin.
İki komanda 28-ci dəfə üz-üzə gələcək. Əvvəlki görüşlərdən cəmi 4-də "Sumqayıt" qələbə qazana bilibsə, 20 matçda "Qarabağ" sevinib. Cəmi 3 qarşılaşma isə heç-heçə ilə yekunlaşıb. Topların nisbətində də Ağdam təmsilçisi xeyli üstündür - 56:12. “Qarabağ” ardıcıl 4 quru hesablı qələbə qazanıb, “Sumqayıt” 14 oyundur bunu bacarmır.
Azərbaycan Premyer Liqası, XXII tur
1 aprel (bazar ertəsi)
14:00. “Qəbələ” – “Sabah” - 0:0
Qırmızı vərəqə: Kərim Diniyev, 90+1
Hakimlər: Rauf Cabarov, Yaşar Abbasov, Müslüm Əliyev, Nail Nağıyev
Hakim-inspektor: Ceyhun Haşımov
AFFA nümayəndəsi: Asif Əliyev
Qəbələ şəhər stadionu
İlk 3 dövrədəki oyunlar - 0:1, 2:1, 1:0
18:30. “Sumqayıt” – “Qarabağ” - 0:6
Qollar: Dani Kintana, 17. Mahir Mədətov, 20; 40. Filip Ozobiç, 50. Abdullah Zubir, 78; 84
Hakimlər: Rəvan Həmzəzadə, Vüqar Bayramov, Əli Cəbrayılov, Kamal Umudlu
Hakim-inspektor: Munis Abdullayev
AFFA nümayəndəsi: Ramiz Mustafayev
“Kapital Bank Arena”
İlk 3 dövrədəki oyunlar: 0:1, 0:2, 0:2
Qeyd edək ki, turun ilk oyun günündə "Səbail" səfərdə "Zirə"ni 2:1, "Neftçi" "Keşlə"ni 1:0 hesabı ilə yenib.
