UEFA Çempionlar Liqasında 1/4 final mərhələsinin ilk görüşləri başa çatıb.
Sportnet.az-ın məlumatına görə, ikinci oyun günündə daha 2 qarşılaşma keçirilib. "Mançester Yunayted" İngiltərədə İspaniya "Barselona"sını qəbul edib. Görüş qonaq komandanın minimal hesablı qələbəsi ilə yekunlaşıb - 1:0. 12-ci dəqiqədə Luis Suaresin baş zərbəsindən sonra Lük Şouya dəyən top tora daxil olub. Yan xətt hakimi bu epizodda ofsaydın olduğunu iddia etsə də, VAR sisteminə müraciət olunduqdan sonra italiyalı baş hakim Canluka Rokki mərkəzi göstərib. Səfər qələbəsi sayəsində "Barselona" yarımfinala vəsiqə şanslarını yüksəldib.
Gecənin digər matçında "Ayaks" Hollandiyada İtaliya "Yuventus"unu qəbul edib. Matç 1:1 hesablı heç-heçə ilə yekunlaşıb. 45-ci dəqiqədə qonaq komandadan Kriştianu Ronaldu fərqlənsə də, ikinci hissə başlayan kimi David Neres bərabərlik qolunu vurub. Beləliklə, ikinci oyun günü qonaqlar üçün sərfəli hesablarla başa çatıb. Halbuki, ötən gecə keçirilmiş qarşılaşmalarda meydan sahibləri qələbə qazanıb. İngiltərədə "Tottenhem" "Mançester Siti"ni 1:0, "Liverpul" isə Portuqaliya "Portu"sunu 2:0 hesabı ilə yenib.
Cavab görüşləri 16-17 apreldə keçiriləcək.
------------------
Bu gün UEFA Çempionlar Liqasında 1/4 final mərhələsinin daha iki oyunu keçiriləcək.
Sportnet.az-ın məlumatına görə, qarşılaşmalar Hollandiya və İngiltərədə təşkil olunacaq.
İngiltərədəki matçda "Mançester Yunayted" İspaniya "Barselona"sını qəbul edəcək. Hər iki kollektiv 1/8 finalda Fransa təmsilçilərini mübarizədən kənarlaşdırıb. "Qırmızı şeytanlar" PSJ-ni, Kataloniya klubu isə "Lion"u üstələyib. Komandaların heç birinin heyətində cəzalı futbolçu yoxdur. Meydan sahiblərində Erik Bayi, Antonio Valensiya, Mateo Darmian və Aleksis Sançes zədəyə görə meydana çıxa bilməyəcək. Ander Errera və Markus Raşfordun isə matçda iştirakı sual altındadır. Qonaqlarda Usman Dembelenin oynayıb-oynamayağı bəlli deyil.
Hollandiyada "Ayaks" İtaliya "Yuventus"unun müqavimətini qırmağa çalışacaq. Amsterdam komandası bundan öncəki mərhələdə turnirin son qalibi İspaniya "Real Madrid"ini yarışdan kənarlaşdırıb. "Yuventus" isə Madridin digər komandası "Atletiko"nu məğlubiyyətə uğradıb. Meydan sahiblərində Nussair Mazraui cəza, Hassan Bande isə zədə səbəbindən oyunu buraxacaq. Turin klubunda isə zədəli Martin Kaseres, Andrea Bartsalyi, Mattia Perin və Emre Canın matçı buraxacaqları dəqiqdir. Kriştianu Ronaldu və Duqlas Kosta isə bərpa olunublar və oyuna hazırdırlar.
Çempionlar Liqası
1/4 final, ilk oyunlar
10 aprel
23:00 "Mançester Yunayed" (İngiltərə) - "Barselona" (İspaniya) - 0:1
Qol: Lük Şou, 12 (öz qapısına)
Baş hakim: Canluka Rokki (İtaliya)
Mançester. "Old Trafford" stadionu
23:00. "Ayaks" (Hollandiya) - "Yuventus" (İtaliya) - 1:1
Qollar: David Neres, 46 - Kriştianu Ronaldu, 45
Baş hakim: Karlos del Cerro Qrande (İspaniya)
Amsterdam. "Yohan Kroyf Arena"
Qeyd edək ki, 1/4 final mərhələsinin ilk 2 oyununda İngiltərədə "Liverpul" Portuqaliya "Portu"sunu 2:0, "Tottenhem" "Mançester Siti"ni 1:0 hesabı ilə yenib.
