"Volqa" klubu "Çelyabinsk"lə keçirəcəyi Rusiya çempionatının XIX tur matçına xüsusi forma dəsti ilə çıxacaq.
Sportnet.az-ın Ulyanovsk təmsilçisinin rəsmi saytına istinadən məlumatına görə, futbolkalarda Vladimir Lenin kepka, qapıçı əlcəyi və sağ əlində topla təsvir olunub. Digər əli ilə isə o, irəliyə yol göstərir.
"Volqa"nın açıqlamasında bildirilir ki, komanda belə formada cəmi bir oyun keçirəcək. Bu görüş Leninin doğum günü olan aprelin 22-nə təsadüf edəcək. Daha sonra oyun dəstləri hərracda satılacaq. Aksiyadan əldə olunan gəlir xeyriyyə məqsədlərinə sərf olunacaq.
Qeyd edək ki, hazırda "Volqa" "Ural-Povoljye" zonasında 3-cü, "Çelyabinsk" isə 9-cu yeri tutur.
