Azərbaycan Premyer Liqasında X tura start verilib.
Sportnet.az-ın məlumatına görə, həftənin açılış oyununda ikinci sıradakı "Neftçi" lider "Qarabağ"ı qəbul edib. "Bakcell Arena"da baş tutmuç matçda hesab açılmayıb.
Görüş "Neftçi"nin üstünlüyü şəraitində keçib. Flaqman bir neçə epizodda qol imkanlarından yararlana bilməyib.
Uzatma dəqiqələrində referi İnqilab Məmmədov "ağ-qaralar"ın baş məşqçisi Roberto Bordinə sarı vərəqə göstərib. Səbəb Tural Axundovun "Qarabağ"ın müdafiəçisi ilə mübarizədə yerə yıxılmasına onun penalti istəyi olub.
Bu heç-heçədən sonra xalını 26-ya çatdıran Ağdam təmsilçisi cari çempionatda məğlubiyyətsizlik seriyasını davam etdirib. Paytaxt komandası isə xalını 18-ə yüksəldib.
Qeyd edək ki, tura sabah keçiriləcək "Səbail" - "Keşlə" görüşü ilə davam edəcək. Bazar günü isə "Zirə" - "Sumqayıt" və "Qəbələ" - "Sabah" duelləri olacaq.
--------------------
Bu gün Azərbaycan Premyer Liqasında X tura start veriləcək.
Sportnet.az xəbər verir ki, turun açılış oyununda bütün milli çempionatların iştirakçısı olan “Neftçi” və “Qarabağ” komandaları qarşılaşacaq. “Bakcell Arena”da keçiriləcək matç saat 20:00-da start götürəcək.
Son 6 mövsümün qalibi olan ağdamlılar çempionluq estafetini məhz bakılılardan təhvil alıblar. “Ağ-qaralar” bunadək ardıcıl 3 dəfə qızıl medala sahib çıxmışdılar. “Neftçi” və “Qarabağ” indiyə qədər 77 dəfə qarşılaşıb. Bunlardan 20-də paytaxt, 29-da isə əyalət təmsilçisi qələbə qazanıb. Qalan 28 görüşdə heç-heçə qeydə alınıb. Qurban Qurbanovun rəhbərlik etdiyi kollektiv top fərqində də üstündür – 84:71.
Roberto Bordinin baş məşqçi olduğu komanda son 3 oyunda qalib gəlməyib. “Qarabağ” 5 matçdır meydanı qolsuz tərk etmir. Əzəli rəqiblərin I dövrədə IV tur qarşılaşmasında meydan sahibi olan Ağdam komandası qələbə qazanıb – 2:0. Tofiq Bəhramov adına Respublika stadionunda baş tutan matçın 31-ci dəqiqəsində Mahir Emreli, 70-ci dəqiqəsində isə Abdullah Zubir fərqlənib.
Hesabında 17 xal olan “Neftçi” 2-ci pillədə qərarlaşıb. Paytaxt təmsilçisi 15 qol vurduğu halda, öz qapısında 8 top görüb. Cari çempionatda “Neftçi”nin heyətində ən məhsuldar futbolçu Stiven Monrozdur. Onun hesabında 4 top var. Kapitan Emin Mahmudovla Baqali Dabo hərəyə 3 dəfə fərqləniblər. Anton Krivotsyuk, Tural Axundov, Soni Mustivar, Dario Frederiko və Rauf Əliyev isə 1 qol vurub.
Ən yaxın izləyicisini 8 xal qabaqlayan “Qarabağ” cari çempionatda məğlub olmayan yeganə komandadır. Lider vurduğu 19 qolun qarşılığında cəmi 2 top buraxıb. “Köhlən atlar”ın heyətində ən çox qol vuran İsmayıl İbrahimlinin də hesabında 4 dəqiq zərbə var. Mahir Emreli ilə Maqaye Qeye hərəyə 3 dəfə rəqib qapısına yol tapıblar. Dani Kintana və Abdullah Zubir onlardan 1 top geri qalırlar. Qara Qarayev, Xayme Romero, Abbas Hüseynov və Riçard Almeyda isə hərəyə 1 dəfə fərqləniblər. Ağdamlıların 1 qolu isə avoqol kimi qeydə alınıb. “Qarabağ”ın səfərdə “Zirə”ni səfərdə 3:1 hesabı ilə məğlub etdiyi oyunda Anastasios Papazoqlu qapıların yerini səhv salıb.
“Qarabağ”da uzun müddətə sıradan çıxan Filip Ozobiçi nəzərə almasaq, komandaların heyətində cəzalı və zədəli futbolçu yoxdur.
Premyer Liqa
X tur
20:00. “Neftçi” – “Qarabağ” - 0:0
Hakimlər: İnqilab Məmmədov, Rahil Ramazanov, Pərvin Talıbov, Kamal Umudlu
Hakim-inspektor: İmanxan Sultani
AFFA nümayəndəsi: Ramiz Mustafayev
Bakı, “Bakcell Arena”
