Azərbaycan Premyer Liqasında II dövrəyə yekun vurulub.
Sportnet.az xəbər verir ki, XIV tura təsadüf edən ilin son matçında "Sabah" "Neftçi"ni qəbul edib. Masazırdakı "Kapital Bank Arena"da baş tutan qarşılaşmada qonaqlar qalib gəlib - 2:0. Oyunun 45+2-ci dəqiqəsində Anton Krivotsyuk künc zərbəsindən sonra başla fərqlənib. Son nöqtəni isə Stiven Monroz 90+2-ci dəqiqədə qoyub.
Bu qələbədən sonra xalını 25-ə çatdıran "Neftçi" 2-ci pilləyə yüksəlib. "Ağ-qaralar" lider "Qarabağ"dan 6 xal geri qalırlar. "Sabah" isə 13 xalla 6-cı sıradadır.
Turun qalan görüşlərinə gəlincə, "Zirə" "Səbail"i darmadağın edib - 4:1. "Qarabağ" - "Keşlə" 2:2, "Sumqayıt" - "Qəbələ" isə 1:1 hesablı heç-heçə ilə yekunlaşıb.
Qeyd edək ki, III dövrəyə gələn il fevralın 1-də start veriləcək.
---------
Azərbaycan Premyer Liqasında XIV turun daha bir oyunu keçirilib.
Sportsnet.az-ın məlumatına görə, "Kapital Bank Arena"da Sumqayıt" və "Qəbələ" komandaları üz-üzə gəlib. Görüş 1:1 hesablı heç-heçə ilə yekunlaşıb. Hesabı 23-cü dəqiqədə qonaq komandadan Fernan Lopes açıb. 31-ci dəqiqədə meydan sahiblərinin hücumçusu Peyman Babayi penaltini dəqiq yerinə yetirərək, bərabərliyi təmin edib. Bu, cənubi azərbaycanlı hücumçunun Premyer Liqada 6-cı qolu olub. Nəticədə Babayi bombardirlər siyahısında "Keşlə"nin hücumçusu Lorenzo Frutosa çatıb.
İkinci hissədə qapılara qol vurulmasa da, "Qəbələ" iki oyunçusunu itirib. 65-ci dəqiqədə qapıçı və kapitan Anar Nəzirov birbaşa qırmızı, 86-cı dəqiqədə Qismət Alıyev ikinci sarı vərəqəni alaraq, meydandan kənarlaşdırılıb. Lakin yerli komanda say üstünlüyündən yararlanmağı bacarmayıb.
Beləliklə, "Sumqayıt" qış fasiləsinə 18 xalla 4-cü, "Qəbələ" 13 xalla 7-ci pillədə çıxıb. Qeyd edək ki, turun ilk 2 oyununda "Qarabağ "Keşlə" ilə 2:2 hesablı heç-heçə edib, "Zirə" isə Səbail"i darmadağın edib. Tura hazırda davam edən "Sabah" - "Neftçi" matçı ilə yekun vurulacaq.
----------
Azərbaycan Premyer Liqasında XIV turun daha bir oyunu keçirilib.
Sportnet.az-ın məlumatına görə, ilin son turunun növbəti matçında "Zirə" "Səbail"i qəbul edib. Zirə İdman Kompleksinin stadionunda təşkil olunan qarşılaşma meydan sahiblərinin 4:1 hesablı qələbəsi ilə yekunlaşıb.
Görüşdə hesab 5-cı dəqiqədə açılıb. "Zirə"nin heyətində Nicat Süleymanov fərqlənib. Gənc yarımmüdafiəçi 20-ci dəqiqədə özünün və komandasının ikinci qoluna imza atıb. İlk yarıda başqa qol olmayıb. 60-cı dəqiqədə "Zirə"nin rumıniyalı müdafiəçisi Adrian Skarlatake fərqi daha da artırıb. 78-ci dəqiqədə isə Eriko da Silva fərqi azaldıb. Lakin 89-cu dəqiqədə Tellur Mütəllimov görüşdə son nöqtəni qoyub.
Bu nəticədən sonra "Zirə" 17-ci xalını qazanıb. Qəsəbə təmsilçisinin çempionatın ilk yarısını 5-ci pillədə başa vuracağı dəqiqləşib. "Səbail" isə 12 xalla sonuncu - 8-ci yerdə qalıb. Axırıncı qələbəsini 4-cü turda qazanan komandanın qələbəsiz oyunlar seriyası 10-a çatıb.
-----------
Bu gün Azərbaycan Premyer Liqasında ilin son oyunları keçiriləcək.
Sportnet.az-ın məlumatına görə, XIV tura təsadüf edəcək 3 qarşılaşmanın ardından çempionatda fasilə yaranacaq. Mövsümün ilk yarısına isə Azərbaycan Kubokunun 1/4 final matçları ilə yekun vurulacaq.
Günün oyunlarından biri kubok mübarizəsində də üz-üzə gələcək "Zirə" və "Səbail" komandaları arasında olacaq. Matçı FIFA referisi Əliyar Ağayev idarə edəcək. Hazırda "Səbail" 12 xalla sonuncu, "Zirə" 14 xalla 5-ci pillədə yer alıb. Meydan sahibləri qalib gəlsələr 5-ci, qonaqlar qələbə qazansalar 4-cü pilləyə yüksələ bilərlər.
İki komanda Premyer Liqada 10-cu dəfə görüşəcək. "Səbail" meydanı 3 xalla tərk etsə, qələbə sayında "Zirə" ilə bərabərləşəcək. Daha 2 görüş isə heç-heçə ilə yekunlaşıb. Topların nisbətində də "qartallar" öndədir - 8:5. “Səbail” son iki matçda qol vurub. “Zirə” üç oyundur evdə qalib gəlmir.
Eyni saatda "Sumqayıt" və "Qəbələ" komandaları "Kapital Bank Arena"da meydana çıxacaqlar. Hazırda 17 xala malik meydan sahibləri uduzmasalar, mövsümü elə 4-cü yerdə bitirəcəklər. 12 xalla 7-ci yerdə gedən qonaq komanda isə qələbə təqdirində 5-ci pilləyədək irəliləyə bilər.
Bu görüş də tərəflər üçün çempionatda yubiley qarşılaşması olacaq. 30-cu matç ərəfəsində "Qəbələ" "Sumqayıt"a nəzərən böyük fərqlə üstünlüyə malikdir. Qonaqlar 17, meydan sahibləri 4 qələbə qazanıblarsa, daha 8 görüşdə qalib müəyyənləşməyib. Topların nisbətində isə "qırmızı-qaralar" 47:23 hesabı ilə öndədirlər. Lakin son iki matçda “Sumqayıt” quru hesabla qalib gəlib. “Qəbələ” son iki səfərdən üstün ayrılmayıb. Ötən mövsüm Azərbaycan Kubokunun finalında da məhz bu komandalar üz-üzə gəlmiş və "qırmızı-qaralar" 1:0 hesablı qələbə sayəsində tarixində ilk tituluna sahib çıxmışdılar.
Günün son matçı "Bank Respublika Arena"da "Sabah" və "Neftçi" arasında keçiriləcək. Yeni baş məşqçi Jelko Sopiçin rəhbərliyi altında çempionatda ikinci görüşünə çıxacaq meydan sahibləri hazırda 13 xalla 6-cı, "Neftçi" isə 22 xalla 3-cü pillədə qərarlaşıb. Flaqman özündən irəlidəki "Qarabağ" və "Keşlə"nin bu tur xal itirməsindən yararlanmağa çalışacaq. "Ağ-qaralar" qələbə qazansalar, 2-ci pilləyə yüksələcəklər və liderlə xal fərqini 6-ya endirəcəklər. "Sabah" isə 1 pillə irəliləyə bilmək üçün ilk növbədə, qalib gəlməlidir.
Bu, iki komanda arasında 6-cı görüş olacaq. "Neftçi" ilk dövrədə öz meydanında 1:1 hesablı heç-heçə etməklə, ilk dəfə "Sabah"a xal verib. Ötən dövrənin bütün 4 oyununda isə flaqman qalib gəlib. Başqa sözlə, “Sabah” öz meydanında xal qazanmayıb, “Neftçi” isə bütün oyunlarda qol vurub. Topların nisbətində də "ağ-qaralar" ciddi fərqlə öndədirlərlər - 10:2.
Azərbaycan Premyer Liqası, XIV tur
8 dekabr (bazar)
15:00. “Zirə” – “Səbail” - 4:1
Qollar: Nicat Süleymanov, 5; 20. Adrian Skarlatake, 60. Tellur Mütəllimov, 89- Eriko Da Silva, 78
Hakimlər: Əliyar Ağayev, Akif Əmirəli, Zeynal Zeynalov, Rauf Allahverdiyev
Hakim-inspektor: Şahin Cəfərov
AFFA nümayəndəsi: Mübariz Hüseynov
Zirə İdman Kompleksinin stadionu (Pfl.az/canlı)
15:00. “Sumqayıt” – “Qəbələ” - 1:1
Qollar: Peyman Babayi, 31 (pen.) - Fernan Lopes, 23
Qırmızı vərəqələr: Anar Nəzirov, 65, Qismət Alıyev, 86 (hər ikisi "Qəbələ")
Hakimlər: Vüqar Həsənli, Elşad Abdullayev, Pərvin Talıbov, Orxan Məmmədov
Hakim-inspektor: Ömər Paşayev
AFFA nümayəndəsi: Eldəniz Musayev
“Kapital Bank Arena” (“CBC Sport”/canlı)
17:00. “Sabah” – “Neftçi” - 0:2
Qollar: Anton Krivotsyuk, 45+2. Stiven Monroz, 90+2
Hakimlər: Rauf Cabarov, Nahid Əliyev, Müslüm Əliyev, Namiq Bəkirov
Hakim-inspektor: Ceyhun Haşımov
AFFA nümayəndəsi: Əsgər Əmirəliyev
“Bank Respublika Arena” (“CBC Sport”/canlı)
Qeyd edək ki, turun açılış matçında "Qarabağ" "Keşlə" ilə heç-heçə edib - 2:2.
