Qış fasiləsində hazırlıqlarını Türkiyədə davam etdirən "Qəbələ”nin təlim-məşq toplanışında klubun futbol akademiyasının 5 yetirməsi iştirak edir. Sportnet.az-ın məlumatına görə, onlardan biri olan Elnur Mustafazadə artıq klubun tarixinə düşməyi bacarıb.
Bu il 20 yaşını qeyd edəcək yarımmüdafiəçi "Qəbələ”nin tarixində rəsmi matçlarda meydana çıxan ən gənc futbolçudur. 2011/12 mövsümündə 2012-ci il aprelin 29-da "Bakı” ilə ev matçının (4:0) 73-cü dəqiqəsində Dodonu əvəzləyən yarımmüdafiəçi 16 yaş 7 ay 25 günlüyündə əsas komandada debüt etmişdi. Gənc futbolçu əsas heyətə cəlb olunmağını bu cür xatırlayır: "Hələ 2012-ci ildə 16 yaşım olanda "Qəbələ”nin əsas heyətinə cəlb olunmuşdum. Onda komandanın baş məşqçisi Fatih Kavlak idi. Ondan sonra əsas komandadan ayrı düşsəm də, məşqlərdə çalışıb, əvəzedici və U-19 komandasının oyunlarında özümü yaxşı tərəfdən göstərməyə çalışırdım. İnanırdım ki, yenidən əsas komandaya qayıdacam. Qış təlim-məşq toplanışı öncəsi məşqçimiz dedi ki, əvəzedici heyətin 5 üzvü də əsas komandanın hazırlıqlarına qatılacaq. Özümə güvəndiyimdən bu oyunçular arasında yer alacağımı bilirdim”.
Debüt oyunundan sonra əsas komandada oynamaq imkanı qazanmayan Mustafazadə burada möhkəmlənməyin özündən asılı olduğunu bildirib: "Özümü yaxşı tərəfdən göstərsəm, əsas heyətdə qala bilərəm. Bunun üçün də əlimdən gələni edəcəyəm. Çox istəyirəm ki, "Qəbələ”nin uğur qazanması üçün çalışmaq imkanı əldə edim. Əsas komandada özümü rahat hiss edirəm, heç bir çətinlik yoxdur. Çünki gənclərin hamısı akademiyadan tanıdığım futbolçulardır. Daha təcrübəlilər isə biz gənclərə dəstək olur, kömək edirlər. Yeni baş məşqçimiz Roman Qriqorçuk haqda yalnız onu deyə bilərəm ki, gənclərə xüsusi diqqət yetirir. Bizim çalışmaları izləyir, hər səhvimizi, çatışmazlığı deyir, bunu aradan qaldırmaq üçün məsləhətləri ilə bizə dəstək olur”.
Qeyd edək ki, Elnur Mustafazadə əvəzedicilərin çempionatında mövsümün ilk yarısında 8 oyun keçirib, 3 qol vurub.
