Azərbaycan Premyer Liqasında VII turun “Qəbələ” - “Zirə” görüşü iki komanda arasında ümumilikdə 26-cı duel kimi tarixə düşəcək.
Sportnet.az xəbər verir ki, əvvəlki 25 qarşılaşmada 9 qələbə qazanan “Qəbələ” 11 heç-heçə edib və 5 dəfə məğlub olub. Rəqib qapısına 33 qol vuran “Qəbələ” 22 top buraxıb. “Qırmızı-qaralar”ın bu oyunlarda ən yaxşı bombardiri 4 qol vuran Aleksey Qaydır.
İndiyədək keçirilən 25 görüşdən 23-ü çempionat, 2-si kubok çərçivəsində keçirilib. Premyer Liqada 7 dəfə rəqibini üstələyən əyalət komandası 11 matçdan 1 xalla ayrılıb. Digər 5 matçda Bakı klubu qələbə qazanıb. Bu oyunlarda 26 qol vuran “qırmızı-qaralar” 20 top buraxıb.
“Qəbələ” 13-cü dəfə “Zirə”ni öz meydanında qəbul edəcək. 5 qələbəsi olan meydan sahibləri 6 sülhə imza atıb və yalnız bir dəfə uduzub. Doğma divarlar arasında 18 qol vuran komanda 9 top buraxıb.
Xatırladaq ki, oktyabrın 16-da Qəbələ şəhər stadionunda keçiriləcək “Qəbələ” - “Zirə” matçı saat 17:00-da başlayacaq.
