“Oyun bizim üçün yaxşı keçdi. Mübarizə apardıq. Matçın bir hissəsini beş oyunçu ilə keçirdik. Bu da taktiki tapşırıq idi".
Sportnet.az-ın məlumatına görə, bunu futzal üzrə Ukrayna milli komandasının baş məşqçisi Oleksandr Kosenko Bakıda Azərbaycan yığmasına 5:1 hesabı ilə qalib gəldikləri yoldaşlıq görüşündən sonra azfutzal.az-a açıqlamasında deyib.
Təcrübəli mütəxəssis bildirib ki, sınaqçı rəqiblərin güclü olması səhvlərin üzə çıxarılması baxımından faydalıdır: "Əlbəttə, bu bir yoldaşlıq oyunu idi. Bu oyuna görə Avropa çempionatının final mərhələsi üçün hansısa komandanı şanslı, digərini zəif adlandırmaq olmaz. Hər iki tərəf səhvlərini, zəif tərəflərini müəyyənləşdirməyə çalışdı. Sparrinq-rəqiblərin güclü olması da bu baxımdan faydalıdır. Final mərhələsində hamının şansları var".
Kosenko Avropa çempionatının final mərhələsində tapşırıqların fərqli olacağını vurğulayıb: "Hər iki oyunda qələbə qazansaq da, komandamın tam hazır olduğunu deyə bilmərəm. Çünki yoldaşlıq oyunlarına yanaşma fərqli, bəzən isə bu görüşlərdə alınan nəticələr aldadıcı olur”.
