Bakı Dövlət Universitetsinin rektoru, akademik Abel Məhərrəmov yunan-Roma güləşi üzrə ikiqat dünya çempionu Rəsul Çunayevi qəbul edib.
Sportnet.az-ın məlumatına görə, rektor Çunayevi 2016-cı il Rio-de-Janeyro Yay Olimpiya Oyunlarında bürünc medal qazanması münasibətilə təbrik edib.
Bildirib ki, tanınmış pəhləvan dəfələrlə Azərbaycan bayrağını zirvələrə qaldırıb, bir çox mötəbər yarışlarda, o cümlədən Tələbələrin Universiadasında, "Bakı 2015" I Avropa Oyunlarında, son dünya çempionatlarında birincilik əldə edib. Bütün bunları təqdirəlayiq hal hesab edən rektor idmançının gələcəkdə qatılacağı beynəlxalq yarışlarda daha böyük uğurlara imza atmasını arzulayıb.
Çunayev, öz növbəsində, rektora göstərdiyi diqqətə, o cümlədən BDU-da təhsil alan gənc idmançılara qayğısına görə təşəkkür edib. Görüşün sonunda rektor idmançıya hədiyyə təqdim edib, xatirə şəkli çəkdirilib.
