Rusiyanın Kazan şəhərində cüdo üzrə Avropa çempionatına start verilib. Sportnet.az-ın məlumatına görə, bu yarış 2016-cı il Rio-de-Janeyro Yay Olimpiya Oyunlarına lisenziya baxımından da önəmlidir.
Çempionatın qalibinə 400 lisenziya xalı veriləcək. Beynəlxalq Cüdo Federasiyası yekun reytinq siyahısını mayın sonlarında dərc edəcək.
İlk yarış günündə Azərbaycan cüdoçularından 4-ü çıxış edib.
Kişilərdən 60 kq çəki dərəcəsində yer alan İlqar Müşkiyev mübarizəyə 1/16 final mərhələsindən başlayıb. Onun ilk rəqibi Qonsalo Mansinyo olub. Müşkiyev qalib gələrək növbəti mərhələyə yüksəlib. O, 1/8 finalda İsrail idmançısı Artyom Arşanskini üstələyərək 1/4-ə yüksəlib. O, bu mərhələdə Türkiyə təmsilçisi Bekir Özlü ilə üz-üzə gəlib və məğlub olub. Müşkiyev təsəlliverici görüşdə gürcüstanlı Amiran Papinaşviliyə də uduzaraq, 7-ci yerlə kifayətlənib.
Orxan Səfərov isə Arif Bağırovu məğlub edərək (Belarus) 1/4 finala yüksəlib. Səfərovun bu mərhələdəki rəqibi hollandiyalı Jeroen Muren olub. Azərbaycan cüdoçusu bu dəfə də qələbə qazanaraq adını yarımfinala yazdırıb. Daha sonra Səfərov italiyalı Elios Manzini də yenib və finala yüksəlib. Həlledici görüşdə onun rəqibi fransalı Valid Xyar olub. Səfərov görüşə fəal başlayıb. Əvvəlcə yuko, ardından vazari xalları alan cüdoçumuz sonradan təşəbbüsü əldən verib. Nəticədə Xyar ipponla qələbə qazanıb.
Bu, ilk yarış günündə Azərbaycan yığmasının yeganə medalı olub.
66 kq çəkidəki Tərlan Kərimov 1/16 finalda Ferdinand Karapetyanla (Ermənistan) qarşılaşıb və məğlub olub.
Yeganə qadın cüdoçumuz Aişə Qurbanlı 1/16 finalda Reka Puppla (Macarıstan) görüşüb. Qurbanlı məğlub olaraq, mübarizəni dayandırıb.
Qeyd edək ki, Avropa çempionatında Azərbaycanı ümumilikdə 10 cüdoçu təmsil edir. Çempionata aprelin 24-də yekun vurulacaq.
