Rio-de-Janeyro Yay Olimpiya Oyunlarında Azərbaycanın akademik avarçəkənlərdən ibarət Aleksandr Aleksandrov - Boris Yotov dueti 2 nəfərlik qoşa avarlı qayıqla 2000 metr məsafəyə B finalı (7 - 12-ci yerlər) yürüşünə qatılıblar. Sportnet.az-ın məlumatına görə, təmsilçilərimizin rəqibləri serbiyalı Marko Maryanoviç - Andriya Slyukiç, almaniyalı Marsel Hakker - Ştefan Krüger, yeni zelandiyalı Robert Menson - Kristofer Harris, avstraliyalı Devid Uotts - Kristofer Morqan və bolqarıstanlı Georgi Bojilov - Kristian Vasilev cütlükləri olub.
Aleksandr Aleksandrov - Boris Yotov dueti mübarizəni sonuncu sırada başa vurub. Onlar 7 dəqiqə 24.030 saniyə göstəriciyə imza atıblar. B finalının qalibi avstraliyalı cütlük (6 dəqiqə 58.110 saniyə) olub.
