Əsas və 21 yaşadək futbolçulardan ibarət yığmanın sabiq dayaq yarımmüdafiəçisi Abdulla Abatsiyev karyerasını yenidən Azərbaycanda davam etdirə bilər. Sportnet.az-ın məlumatına görə, "İnter"dən ayrıldıqdan sonra klubsuz qalan futbolçunun ölkəmizdə "Zirə" variantı var.
Rusiyanın "Tümen" klubuna keçidi baş tutmadığından, Vladiqafqaz doğumlu Abatsiyev yenidən Azərbaycanda oynamağa yaxındır. Ancaq menecerlər milliləşdirilmiş şimali osetiyalı futbolçunun Türkiyəyə getməsi yolunda da çalışır. Onun Mahir Şükürovun sabiq komandası "Karşıyaka"ya keçidi də gündəmdədir. İzmir klubu ilə danışıqlar müsbət nəticələnməsə, o zaman Abatsiyevi "Zirə"də görəcəyik.
