"Qəbələ" klubu Serbiya "Çukariçki"si ilə Avropa Liqasının II təsnifat mərhələsinin cavab oyunu öncəsi ciddi problemlərlə üzləşib. Sportnet.az-ın əldə etdiyi məlumata görə, Dodo ilə komandanın yeni transferi Aleksey Antonov meydana çıxmaya bilər.
Braziliyalı yarımmüdafiəçi xəstələnib. Onun hərarəti yüksəldiyi üçün son məşqə qatılmayıb. Dodonun hətta matçı buraxacağı da gələn xəbərlər arasındadır.
Antonov isə iki gün öncə məşq zamanı zədələnib. Həkimlər onun meydana çıxması üçün çalışırlar. Antonov ən yaxşı halda, iynə ilə meydana çıxacaq.
Qeyd edək ki, "Çukariçki" - "Qəbələ" matçı bu gün saat 21:00-da başlanacaq. Oyun "Bakcell Arena"da keçiriləcək.
