Premyer Liqanın debütantı olan "Zirə” klubu daha bir legionerin transferini həll edib. Sportnet.az-a verilən özəl məlumata görə, Ərzurumda hazırlıq keçən Bakı klubu bu gün Türkiyədə hollandiyalı hücumçu Rihayro Möylenslə 1+1 il şərti ilə müqavilə imzalayıb.
Rihayro Möylens Hollandiya Erediviziyasında "Vitess”, "Roda” və "Dordrext” klublarının şərəfini qoruyub. O, ölkəsinin I dəstəsində isə AQOVV (Apeldorn), "Dordrext” və "Almere Siti” klublarında oynayıb. Bu hücumçu ötən mövsüm ilk dəfə legioner karyerası yaşayıb. O, Rumıniyada "Rapid”də çıxış edib. Ancaq Rihayronun Buxarest karyerasını uğurlu saymaq olmaz. O, 14 oyuna cəmi 2 qol vurub.
Möylens Hollandiyanın Apeldorn şəhərində doğulsa da, əslən Kurasaodan olduğu üçün bu millinin şərəfini qoruyur. Möylens 2011-ci ilin sentyabrın 7-də DÇ-2014-ün seçmə mərhələsində Haiti millisinə qarşı debüt edib. O ilk beynəlxalq qolunu Antiqua və Barbudaya 2:5 hesabı ilə yenildikləri matçda vurub. 27 yaşlı futbolçu Patrik Kluyvertin rəhbərlik etdiyi yığmaya sonuncu dəfə iyunun 14-də Kuba ilə görüşə çağırılıb. DÇ-2018-in seçmə görüşü olan bu matçda Möylens ehtiyatda qalsa da, səfər qolu hesabına Kurasao millisi növbəti mərhələyə vəsiqə qazanıb – 1:1. Möylens bundan başqa, ötən il Trinidad və Tobaqo millisinin və Fransız Qvianasının qapıçısını məyus edib.
Qeyd edək ki, "Zirə” bundan əvvəl Rəşad Abdullayev, Kamal Bayramov, Aleksandr Şemonayev, Təmkin Xəlilzadə, Viktor İqbekoyi (hamısı AZAL), Tərzin Cahangirov, Sadiq Quliyev, Tellur Mütəllimov (hamısı "Qəbələ", icarə), Hacı Əhmədov ("Qarabağ"), İlqar Hüseynov ("Simurq"), Ruslan Tağızadə ("Qəbələ"), Ruslan Cəfərov ("Xəzər Lənkəran"), Mirkamil Həşimli, Nicat Qurbanov (hər ikisi "Neftçi"), Tato ("Sportinq Xixon", İspaniya), Ruslan Poladov ("Sumqayıt"), Anar Nəzirov ("Qəbələ") və Yovan Krnetanı ("Çernomorets", Ukrayna) transfer edib.
