ispaniya "Barselona"sının lideri Lionel Messi komandanın yeni transferi Arda Turana 10 nömrəli formasını təklif edib. Sportnet.az-ın məlumatına görə, bu barədə türkiyəli yarımmüdafiəçinin özü açıqlama verib.
O, hələlik təklif üzərində fikirləşdiyini bildirib: "Messi mənə "İstəsən, 10 nömrəli forma sənin ola bilər" deyib. Hələlik fikirləşirəm. Mənim üçün formanın əhəmiyyəti yoxdur. Türkiyə yığmasında oynamağa başlayanda 14 nömrəli formanı götürmüşdüm. Çünki atam hollandiyalı Yohan Kroyfun azarkeşi idi".
Arda "Barsa"nın heyətində 2016-cı ilin yanvarınadək çıxış edə bilməyəcək. Məhz həmin vaxt FİFA-nın yeni oyunçuların qeydiyyatına dair qadağası qüvvədə olacaq. Qeyri-adi təklif Messinin klubdan gedəcəyinə dair şayiələrə səbəb ola bilər. Hücumçu İspaniyanın vergi orqanları tərəfindən izlənilməsi səbəbindən komandanı tərk edə biləcəyinə dəfələrlə işarə vurub.
Qeyd edək ki, Arda Turan "Barselona"ya iyulun əvvəllərində İspaniya "Atletiko"sundan keçib. O, ötən mövsüm Madrid komandasında 46 oyuna 3 qol və 6 məhsuldar ötürmə müəllifi olub.
