"Oyun maraqlı keçdi. Komandamız "Sumqayıt"la matçlarda həmişə çətinliklə üzləşib. Bu gün də belə oldu". Sportnet.az-ın məlumatına görə, bunu Xəzər Lənkəran"ın baş məşqçisi Yunis Hüseynov 1:1 hesablı heç-heçə ilə nəticələnən Azərbaycan Premyer Liqasının II tur matçından sonra "CBC Sport"a açıqlamasında deyib.
50 yaşlı mütəxəssis 3 xal qazanmağa çalışdıqlarını, amma imkanlardan yararlana bilmədikləri üçün təəssüfləndiyini dilə gətirib. Hüseynov bunu gənc futbolçuların təcrübəsizliyi ilə əlaqələndirib. Bununla belə, baş məşqçi səfərdə 1 xal qazandıqları üçün futbolçularına təşəkkür edib.
O, FİFA-nın transfer qadağası bitdikdən sonra yalnız təcrübəli oyunçulardan ibarət yeni transferlərin çıxış edəcəkləri fikri ilə razılaşmayıb: "Futbolda kim hazırdırsa, o da meydana çıxmalıdır. Yeni transferlərimiz təcrübəli futbolçulardan ibarətdir. Amma onlar da düşünürlər ki, kim formada olacaqsa, kim meydanda can yandıracaqsa, kimin köməyi dəyəcəksə, o da əsas heyətdə oynayacaq. Bizim üçün gənc və ya təcrübəlinin fərqi yoxdur".
Hüseynov "Xəzər Lənkəran"ın hədəfini də açıqlayıb: "Hər bir komandanın hədəfi çempionluq olur. Biz də ümumilikdə Avropa kuboklarına vəsiqə üçün çalışırıq".
