Jurnalist Rasim Əliyevin ölümünə görə həbs edilən "Qəbələ” futbol klubunun kapitanı Cavid Hüseynovun zaminliyə buraxılması ilə bağlı bir qrup media təmsilçisi Azərbaycan Respublikasının Prezidenti İlham Əliyev cənablarına və Azərbaycan Respublikasının Baş Prokuroru Zakir Qaralova müraciət edib. İdman mediasından yalnız "Futbol+” qəzetinin qatıldığı həmin müraciəti olduğu kimi diqqətinizə çatdırırıq:
"Cənab Prezident
Milli mətbuatın 140 illiyinin dövlət tərəfindən yüksək səviyyədə qeyd olunmasından bir neçə gün sonra jurnalist Rasim Əliyevin ölümü ilə nəticələnən olay hər birimizi içdən ağrıtdı. Mətbuat günündə medianı təltif edən dövlət başçısı kimi Sizin belə ağır gündə baş vermiş hadisəni şəxsən nəzarətə götürməniz sözün həqiqi mənasında mətbuatın dostu olmanızı bir daha təsdiqlədi. Həm bayramımızda, həm də faciəmizdə bizimlə birgə olmanız azad sözə və azad mediaya dövlətin ən böyük dəstəyidir. Mərhum həmkarımızın ölümü bizim hər birimizi kədərləndirdi. Sizin, medianın dostu olaraq, bu hadisəni şəxsən nəzarətə götürməniz həmkarımız Rasim Əliyevin qatillərinin öz cəzasını alacağına tam inam yaradır.
Cənab Prezident!
Baş vermiş cinayətlə bağlı həbsdə yatan "Qəbələ” futbol klubunun oyunçusu Cavid Hüseynov Azərbaycan bayrağının rəqib klubun azarkeşləri tərəfindən təhqir olunmasına etiraz edib. Onun "Qəbələ”futbol klubunu növbəti mərhələyə çıxaran qolu milli və idman şərəfimizin qorunması idi. Sonradan baş verən olayları istintaq aydınlaşdıracaq və Cavid Hüseynovun bu hadisədə iştirakını müəyyənləşdirəcək.
Cənab Prezident!
Cavid Hüseynovun "Qəbələ ” futbol klubunun növbəti oyununda azarkeş qismində belə iştirakı həm futbolçularımıza, həm də xalqımıza böyük ruh yüksəkliyi gətirərdi. Azərbaycan bayrağının şərəfini qoruyaraq həbsdə olmuş Ramil Səfərovun mümkün görünməyən azadlığına nail olan, dünyanın ən uca bayrağı kimi Bakıda Bayraq Meydanının yaradılmasına imza atan, son Avropa Oyunlarında Azərbaycan bayrağının ucaldılmasından və himnimizin səsləndirilməsindən yüksək qürur hissi keçirən Sizə müraciət edirik. Hazırda həbsdə olan "Qəbələ”futbol klubunun oyunçusu Cavid Hüseynovun vətənpərvərliyini, bayraq sevgisini, onun ittiham olunduğu maddənin ictimai təhlükəliliyinin az olmasını nəzərə alaraq, futbolçunun məhkəmə hökmünə qədər zaminə buraxılmasına yardımçı olmanızı xahiş edirik”!
"Futbol+” qəzetinin baş redaktoru Mahir Rüstəmli Sportnet.az-a açıqlamasında müraciətə imza atmasını belə izah edib:
"Müraciətin məğzi odur ki, mümkünsə, Cavid Hüseynovun məhkəmə hökmünə qədər zaminə buraxılmasına yardımçı olun. Bu praktika həm dünyada, həm də Azərbaycanda var. Cavid Hüseynov ictimai əhəmiyyətli fiqurdur, təbii ki, istintaqdan yayına, harasa qaça bilməz. Həmkarımız Rasim Əliyevin ölümündə hansısa formada günahı varsa, təbii ki, cəzasını alacaq. Günahkar deyilsə, onsuz da azadlığa çıxacaq”.
Qeyd edək ki, ilkin məhkəmə Cavid Hüseyinov barəsində 3 aylıq həbs qəti imkan tədbiri seçib. Futbolçunun Apeliyasiya şikayətinə baxıldıqdan sonra cəzanın tətbiqinə aydınlıq gələcək.
