Cüdo üzrə Azərbaycan milli komandasına yeni baş məşqçi təyin olunub. Sportnet.az-ın məlumatına görə, avstriyalı mütəxəssis Peter Zayzenbaxer 2 illik aradan sonra yığmanın baş məşqçi postuna qaytarılıb.
Onun rəsmi təqdimat mərasimi sabah Bakıdakı "Yaxt-klub"da keçiriləcək. Tədbirdə Azərbaycan Cüdo Federasiyasının (ACF) vitse-prezidenti Sadıq Sadıqov da iştirak edəcək.
Qeyd edək ki, Peter Zayzenbaxer 2012-ci il London Yay Olimpiya Oyunlarındakı uğursuzluqdan sonra Azərbaycan milli komandasına baş məşqçi təyin olunub. O, Ağayar Axundzadəni əvəzləyib. Zayzenbaxerin rəhbərliyi altında 100 kq çəki dərəcəsində mübarizə aparan Elxan Məmmədov 2013-cü ildə Azərbaycanın cüdo cüdo tarixində ilk dəfə dünya çempionu olub. Lakin avstriyalı mütəxəssis 2014-cü ilin əvvəllərində maliyyə məsələlərində razılığa gələ bilmədiyi üçün ACF-nin əvvəlki rəhbərliyi ilə yollarını ayırıb.
