Türkiyə və Yunanıstan milli komandaları arasında yoldaşlıq görüşü keçiriləcək. Sportnet.az-ın məlumatına görə, oyun noyabrın 17-də İstanbuldakı "Başakşehir Fatih Terim" stadionunda baş tutacaq.
"Ay-ulduzlular" artıq AVRO-2016-nın final mərhələsinə vəsiqəni təmin edib. Yunanıstan millisi isə seçmə mərhələdə qrup sonuncusu olub. Uğursuzluq səbəbindən elladalılar baş məşqçi dəyişikliyinə əl ataraq, Mixael Skibbe ilə müqavilə bağlayıb.
İndiyədək Türkiyə və Yunanıstan yığmaları 9 dəfə üz-üzə gəliblər. Bunların 6-da "ay-ulduzlular", 1-də rəqib komanda üstün olub, 2 oyunda isə heç-heçə qeydə alınıb. Vurulan qolların nisbəti 15:6-dır. Sonuncu dəfə iki komanda 17 oktyabr 2007-ci ildə "Ali Sami Yen" stadionunda qarşılaşıb. AVRO-2008-in seçmə qrup matçına təsadüf etmiş görüş qonaqların qələbəsi ilə yekunlaşıb - 1:0.
Qeyd edək ki, Yunanıstan Futbol Federasiyasının rəhbərliyi bu ayın əvvəlində Türkiyə Futbol Federasiyasını ziyarət edib. Görüşdə iki ölkə arasındakı münasibətlərin daha da yüksək səviyyəyə çatdırılması istiqamətində strateji əməkdaşlıq müqaviləsi imzalanıb.
