"Qəbələ"nin əsas qapıçısı Dmitri Bezotosnı ALmaniya "Borussiya"sı ilə Dortmundda keçiriləcək Avropa Liqasının qrup mərhələsinin IV tur matçında meydana çıxmayacaq. Sportnet.az-ın məlumatına görə, bu barədə "qara-qırmızılar"ın baş məşqçisi Roman Qriqorçuk açıqlama verib.
Ukraynalı mütəxəssis Bezotosnının yoxluğunu komandası üçün böyük itki adlandırıb. O, noyabrın 5-də keçiriləcək matçda qapını David Petrjkeviçin qoruyacağını əminliklə deməyin tez olduğunu bildirib: "Petrjkeviçdən əlavə, Andrey Popoviç kimi qapıçımız da var. Kimin qapıda duracağına oyunöncəsi son məşqin ardından qərar verəcəyəm. Açığı, çox möhtəşəm təsir bağışladığı bir vaxtda "Borussiya" ilə qarşılaşmaq istəməzdim. İmkanım olsaydı, belə rəqiblə görüşdə qapıya 2 qolkiper qoyardım. Təbii ki, bu, bir zarafatdır".
Qeyd edək ki, Dortmunddakı BVB stadionunda keçiriləcək "Borussiya" - "Qəbələ" matçı Bakı vaxtı ilə saat 22:00-da başlanacaq.
