İdman jurnalistlərinin peşə bayramı niyə qeyd olunmur? - ARAŞDIRMA

2 iyul - Beynəlxalq İdman Jurnalistləri günüdür. Amma hər ilin bu günü Azərbaycanda idman jurnalistlərinin peşə bayramı kimi qeyd olunmur. İdmanla bağlı qurumlar nəinki tədbir təşkil edir, heç öz rəsmi saytları vasitəsilə təbrik etməyi də az qala unudurlar. Hətta bu il əlamətdar hadisədən 90 il ötsə də...

Sportnet.az illərdir davam edən bu xoşagəlməz ənənənin səbəbini araşdırmaq üçün sorğu keçirib.

Mahir Rüstəmli: "İlk növbədə, AİJA fəallıq göstərməlidir”

Futbol + qəzetinin baş redaktoru Mahir Rüstəmli deyib ki, Azərbaycan İdman Jurnalistləti Assosiasiyası (AİJA) təşəbbüs göstərmədiyindən, bu gün heç kimin yadına düşmür: "Mənə elə gəlir ki, bu məsələdə təşəbbüs AİJA-dan gəlməlidir. Yəqin ki, heç bir təşəbbüs göstərmədiklərindən, bu günün önəmi heç kimin yadına düşmür. Amma əlbəttə, fərd olaraq hamı bir-birini təbrik edir. Məsələn, məni bir neçə nəfər təbrik edib, ən azından saytlarda xəbər şəklində yazırlar. Amma ciddi şəkildə yada düşməsi üçün, ilk növbədə, AİJA fəallıq göstərməlidir”.

Rüstəmli, həmçinin jurnalistlər arasında birlik olmadığından, hər hansı təşəbbüsün mümkün olmadığını da qeyd edib: "Jurnalistlər o halda addım atmalıdır ki, tutaq ki, yüngülvari çay-şirniyyatla qeyd edəsən. Bunun üçün müəyyən maliyyə olmalıdır. Çox təəssüf ki, həm də jurnalistlər arasında birlik yoxdur. Bugünkü idman jurnalistikası çox rənglidir, çoxlu adam var və bu çox adamın bir qrupunun məqsədi təkcə idman jurnalistikası ilə məşğul olmaq deyil. Həm də şəxsi mənfəətlərinin təmin olunmasıdır. Ona görə də təəssüf ki, birlik iddiaları, təşəbbüsləri alınmır”.

Jurnalist vaxtilə AİJA-ya müəyyən tələblərlə bağlı müraciət etdiyini də açıqlayıb: "Həmin qurumdan zamanında şəxsən mən də nələrsə tələb etmişəm. Onlar da deyir ki, bizim maliyyə imkanlarımız kasaddır, Gənclər və İdman Nazirliyi bizə pul ayırmır və s. Bu məsələ bir qədər dalana dirənir. Mən qabağa çıxıb nəsə demək istəsəm, kənardan elə görünür ki, mən şəxsi mənafeyimi güdür, özüm önə çıxmaq, liderliyimi göstərmək istəyirəm. Ona görə də bu məsələlərdə dalana dirənmək reallığı var”.

Mirkamil Rəhimov: "Siz özünüz diqqətdən kənarda qalmısınız!”

Gənclər və İdman Nazirliyinin idman şöbəsinin müdiri Mirkamil Rəhimov Beynəlxalq İdman Jurnalistləri gününün Azərbaycanda qeyd olunması təşəbbüsü ilə onlara müraciət edilmədiyini vurğulayıb: " Jurnalistlərin peşə bayramıdır? Təbrik edirəm sizi. Əgər bu gün bunu jurnalistlər yada salmırlarsa, mən idman işçisi kimi, başqa bir sahənin işçisi kimi necə yada salım? İnternetdə verin, hardasa səsinizi qaldırın. Maşallah, səsiniz çoxdur, böyükdür, əliniz hər yerə çatır. Bəs niyə qaldırmamısınız səsinizi? Bayramınız mübarək!”

Rəhimov bildirib ki, bu günlə bağlı müəyyən təklif və ya müraciət olsaydı, nəzərə alınardı: "Bu tədbiri kim görməlidir? Sizin rəhbərliyiniz var, beynəlxalq təşkilatınız var. Məgər yerli təşkilatınız yoxdur? Siz özünüz diqqətdən kənarda qalmısınız! Bizə heç bir təklif daxil olmayıb ki, bu gün sizin ad gününüzdür, yaxud bayramınızdır, yaxud nədirsə. Kim bizə bu barədə müraciət edib? Müraciət edən var? Müraciət olsa, əlbəttə, nəzərə ala bilərdik”.

Eldar İsmayılov: "Mirkamil Rəhimovun sözünü yadınızda saxlayın”

AİJA-nın prezidenti Eldar İsmayılov maddi imkanların məhdudluğu səbəbindən xüsusi tədbir təşkil etmədiklərini bildirib: "Bu gün bizim tədbirimiz yoxdur. Çünki tədbir olması üçün məkan, yer lazımdır. Hər il edirik, amma bu il etmədik. Çünki maddi imkanımız zəifdir. Bunun üçün Gənclər və İdman Nazirliyi, Milli Olimpiya Komitəsi ilə birgə iş görmək lazımdır. Onlar da bilir bu tədbirin olmağını. Bilirlərsə, gərək nə isə təşkil olunaydı”.

İsmayılov deyib ki, əvvəlki illərdə bu məsələ ilə bağlı Gənclər və İdman Nazirliyinə müraciət etsə də, mənfi cavab verilib: "Onlar həmişə deyirlər ki, pulumuz yoxdur. Ona görə də xeyri yoxdur. Mən əvvəlki illər dəfələrlə müraciət etmişəm ora da, başqa yerlərə də. Neçə dəfə biz öz gücümüzlə "Avropa”, "Hilton” otelində və digər məkanlarda tədbir təşkil etmişik. Amma bu il etmədik. Bu yaxınlarda Moldovada idman jurnalistləri arasında Avropa Media Kuboku yarışı keçirildi. Bizdən ora 11 nəfət getdi və 2-ci yerə çıxdıq. 8 ölkə arasında Almaniya, Ukrayna, Litva, Polşadan güclü komandaların iştirak etdiyi oyunda Azərbaycan gümüş medala layiq görüldü. Bu, futbol aləmində yaxşı göstəricidir. Azərbaycanın milli futbol komandası ömründə heç 1/8 finala da çıxmayıb. Amma biz finala çıxdıq və 2-ci olduq”.

Beynəlxalq İdman Jurnalistləri günü ilə bağlı heç bir televiziyanın maraqlanmadığını və indiyədək bu tədbirlərin xərcini özlərinin çəkdiyini deyən İsmayılov növbəti il də nazirliyə müraciət edəcəyini vurğulayıb: "Mirkamil Rəhimovun sözünü yadınızda saxlayın və gələn il bu vaxt görüşək. Mən əvvəlcədən müraciət edəcəyəm, görüm edəcəklər, yoxsa yox. Mən etmişəm, xərcini çəkmişəm, onlar da həmişə iştirak ediblər. İndi də mən xəstəyəm, xəstəlik vərəqəsi ilə müalicə olunuram. Amma nəzərə alaq ki, bu il Azərbaycanda bizim xəttimizlə böyük tədbirlər olub. Maraqlısı budur ki, televiziya kanalları da zəng vurub maraqlanmırlar. Halbuki həmişə bu kanaldan o kanala qaçırdım, çata bilmirdim. Həm də bu bu gün polis işçilərinin peşə bayramı ilə üst-üstə düşür. Nə bilim? Bax belə...”

Sevinc XANQIZI