Hazırlıqlarını Boluda davam etdirən AZAL klubu 7-ci futbolçu transferini rəsmiləşdirib. Sportnet.az-ın məlumatına görə, "təyyarəçilər" honduraslı yarımmüdafiəçi Luis Ramosla müqavilə bağlayıb.
Luis Ramos daha öncə Hondurasın "Club Deportivo Maraton", Slovakiyanın "Jilina" və "Nitra", Macarıstanın "Nyireqyaza", Fransanın "Şatoro" klublarında, eləcə də Hondurasın aşağı yaşlılardan ibarət yığmalarında çıxış edib. O, Hondurasın əsas millisinə 2009-cu il CONCACAF Kubokunda dəvət alsa da, meydana çıxmayıb.
Tam adı Luis Arkanxel Ramos Kolon olan 29 yaşlı yarımmüdafiəçi münasibətləri rəsmiləşdirdikdən sonra klubun rəsmi saytına danışıb: "Hər iki tərəf üçün uğurlu olacağəna inanıram. Məqsədim özümü yaxşı tərəfdən göstərərək yenidən Honduras millisindən dəvət almaqdır. AZAL-da yeni komanda formalaşır. Əlimdən gələni edəcəm ki, komandamız çempionatda uğurlu çıxış etsin”.
Qeyd edək ki, AZAL daha öncə Asif Mirili və Stanislav Namaşko ilə 2 illik müqavilə bağlayıb, Novruz Məmmədov və Orxan Lalayevi "Rəvan”dan, Eltun Yaqublu ilə Təmkin Xəlilzadəni isə "Qarabağ”dan icarəyə götürüb.
