Bakı "İnter”i "Xəzər Lənkəran”ın satışa çıxartdığı hücumçu Junior Nildonun transferində problemlə üzləşib. Bu barədə Sportnet.az-a paytaxt klubunun prezidenti Georgi Nikolov məlumat verib.
Onun sözlərinə görə, Lənkəran təmsilçisi rəhbərliyinin braziliyalı qolçudan ötrü tələb etdiyi məbləğ "İnter”i qane etməyib. Lakin Nikolov məbləğı açıqlamaqdan imtina edib. Klub rəsmisi bildirib ki, Nildonun özü "Xəzər Lənkəran”la razılığa gələ bilsə, onu azad agent kimi "bankirlər”in heyətinə cəlb etmək olar: "Transfer üçün ayrılan büdcəmiz tükənib. Bu səbəbdən, "Xəzər Lənkəran”ın istəyini qarşılaya bilməyəcəyik. Şəxsən mən bu keçidin baş tutacağına inanmıram. Hərçənd baş məşqçimiz Kaxaber Tsxadadze Nildonu hələ AZAL-da ikən bəyənib”.
Qeyd edək ki, Junior Nildo baş məşqçi Oğuz Çetinin istəyi ilə transferə çıxarılıb.
