"Çox gözəl oyun oldu. Təəssüf ki, bu gün qalib gəlmədik, ancaq hər iki komanda çox yaxşı təsir bağışladı". Sportnet.az-ın məlumatına görə, bu sözləri qol.az-a "Neftçi"nin Müşahidə Şurasının sədri Çingiz Abdullayev Azərbaycan Premyer Liqasının XXIX turunda "Xəzər Lənkəran"la 2:2 hesablı heç-heçə etdikləri matçdan sonra deyib.
O, "Neftçi”nin son dəqiqəyə kimi hücum etdiyini söyləyib: "Rəqib komanda yorulmuşdu. Oyun 5-6 dəqiqə də davam etsəydi, "Nefçti" üçüncü qolu vuracaqdı. "Xəzər Lənkəran" çox hücum edə bilmədi. Onlar hər iki qolu standart vəziyyətdən vurdular. Fasilədə futbolçuların bir qədər sakit oynamasını istədik. İnanıram ki, növbəti oyunlarımızı daha yaxşı olacaq və qələbə qazanacağıq".
Ç.Abdullayev komandanın baş məşqçisi Arif Əsədovun istefaya göndəriləcəyi və onu almaniyalı mütəxəssisin əvəzləyəcəyi ilə bağlı iddialara da münasibət bildirib: "Mən bu barədə eşitməmişəm. Düzgün xəbər deyil. Futbolçularımızın oyununda razıyıq. Əsədov yaxşı məşqçidir".
Müşahidə Şurasının sədri belə oyunla "Neftçi"nin Azərbaycan Kubokuna sahib ola biləcəyini vurğulayıb: "Xəzər Lənkəran"la səfər oyununda iki qol vurmaq çətin idi. Hesab bərabərləşdikdən sonra "Neftçi" daha çox hücum edirdi. İnanıram ki, bu cür oyunla nəticə də olacaq".
Ç.Abdullayev komandanın baş məşqçi seçimində ona heç kimin təsir edə bilməyəcəyini də söyləyib: "Mənə təsir edə bilən yeganə insan atam idi. Heç kəs mənə təsir edə bilməz".
