Elşən MƏMMƏDOV
Bu ölkədə hər il onlarla beynəlxalq turnir...
Bu ölkədə hər il dünya və Avropa çempionatları...
Bu ölkədə hər dəfə olimpiya lisenziyalı yarışlar...
Bu ölkədə üç ildir Formula 1 üzrə Azərbaycan Qran Prisi keçirilir.
Bu ölkədə Ümumdünya Şahmat Olimpiadası...
Bu ölkədə ilk Avropa Oyunları...
Bu ölkədə IV İslam Həmrəyliyi Oyunları...
Bu ölkədə futbol üzrə Avropa Liqasının, hətta Çempionlar Liqasının qrup oyunları keçirilib.
Bu ölkədə futbol üzrə Avropa Liqasının final matçı...
Bu ölkədə futbol üzrə Avropa çempionatının oyunları keçiriləcək.
Bu ölkəyə dünyanın ən güclü futbolçusu Kriştianu Ronaldu...
Bu ölkəyə dördqat dünya çempionları İtaliya və Almaniya yığmaları...
Bu ölkəyə dünyanın ən məşhur müğənniləri Şakira, Cennifer Lopes, Rihanna gəlib.
Görəcəksiniz, bu ölkənin futbol millisi ən azı Avropa çempionatına da vəsiqə qazanacaq...
Görəcəksiniz, bu ölkə iki dəfə cəhdi alınmasa da, gələcəkdə Yay Olimpiya Oyunlarına ev sahibliyi edəcək.
Amma...
Bu ölkə heç vaxt Qış Olimpiya Oyunlarında medal qazanmayacaq!
Buraxın medal qazanmağı, bu ölkənin öz idmançısı heç vaxt Qış olimpiadasına lisenziya əldə etməyəcək!
Buraxın, Qış olimpiadasına medalı, lisenziyanı, heç qışın özünü görməyəcəyik!
Baxmayaraq ki...
Bu ölkədə iki Dağ Xizəkçiliyi Mərkəzi...
Bu ölkədə öz təyinatı üzrə istifadə olunmayan Qış Sarayı (İdman-Konser Kompleksi)...
Bu ölkədə hər fürsətdə "Bəs sizin Şahdağda, Tufandağda fotonuz varmı?" deyə xizək üzərində poz verən insanları var.
Bu ölkənin başçısı, Milli Olimpiya Komitəsinin prezidenti İlham Əliyev az qala peşəkarcasına dağ xizəyi sürərək, qış idman növlərinin də inkişafının vacibliyi mesajını verir, hər dəfə Alp dağlarından əcnəbiləri gətirib milliləşdirməyə gərək olmadığına dair nümunə göstərir.
Bəs niyə bu ölkənin qış idman növləri üzrə düz-əməlli idmançısını yetişdirməyə cəhd belə edilmir?
Bax, bunu Torqovı"da tikilən hündürmərtəbəli "İSR Plaza"nın sahibi İsgəndər Xəlilovdan...
Bax, bunu Qış olimpiadasının Açılışında Azərbaycan bayrağını güc-bəla ilə tapıb gətirdikləri avstriyalıya verən onun oğlu, Dağ Xizəyi Federasiyasının prezidenti Rauf Xəlilovdan soruşun.
