Topaz Premyer Liqasının IX turunda "Simurq”a 0:4 hesabı ilə uduzan "Araz Naxçıvan”da klubdaxili iclas keçirilib. Sportnet.az-ın klubun rəsmi saytına istinadən məlumatına görə, rəhbərlik, başda Naxçıvan Muxtar Respublikası gənclər və idman naziri Azad Cabbarov olmaqla məşqçilər və futbolçularla görüş təşkil edilib.
İclasda çıxış edən Cabbarov ilk olaraq komandanın son 7 turda qələbə qazana bilməməsinin səbəblərini məşqçilər korpusu ilə müzakirə edib. Eyni zamanda görüşdə futbolçuların individual, həmçinin kollektiv səviyyələrinin aşağı olduğu diqqətə çatdırılıb və məşqçilərin qarşısına şərt qoyulub.
Klubun icraçı direktoru başda olmaqla, digər işçilərə də ciddi xəbərdarlıq edilib. Komanda ümumi şəkildə cərimələnib və bir neçə futbolçunun göndərilməsinə qərar verilib. Növbəti turlarda komanda bu nəticəni davam etdirəcəyi təqdirdə isə daha ciddi addımlar atılacağı bildirilib.
Qeyd edək ki, komandadan göndərilən futbolçuların adları açıqlanmır.
