2024-cü il Yay Olimpiya Oyunlarını təşkil edəcək şəhərin adı Perunun paytaxtı Limada açıqlanacaq. Sportnet.az-ın məlumatına görə, qalibin adı Beynəlxalq Olimpiya Komitəsinin (İOC) 130-cu sessiyası zamanı elan olunacaq.
Sessiyaya ev sahibliyi etmək uğrunda mübarizədə Lima Finlandiyanın paytaxtı Helsinkini 54:30 səs nisbəti geri qoyub.
Qeyd edək ki, 2024-cü il Yay Olimpiya Oyunlarını təşkil etmək arzusunda olanlar arasında Bakı da var. Azərbaycan paytaxtının mümkün rəqibləri qismində Los-Anceles, Boston (hər ikisi ABŞ), İstanbul (Türkiyə), Doha (Qətər), Durban (CAR), Berlin (Almaniya), Budapeşt (Macarıstan), Roma (İtaliya), Nayrobi (Keniya), Kasablanka (Mərakeş), Sankt-Peterburq (Rusiya) və Kiyevin (Ukrayna) adı çəkilir. Daha öncə Toronto (Kanada), Qvadalahara (Meksika) və Taypey (Tayvan) fikirlərindən daşınıb. Beynəlxalq Olimpiya Komitəsiin (İOC) Təşkilat Komitəsi Parisin də ərizə verəcəyinə ümid edir. Bu halda Fransa paytaxtı 2024-cü il Oyunlarına əsas namizəd sayılacaq. Qələbə əldə olunacağı təqdirdə olimpiada tam yüz ildən sonra Parisə qayıdacaq. Namizəd şəhərlərin yekun siyahısı 2015-ci il sentyabrın 15-də, qalib şəhərin adı isə 2017-ci ilin ortalarında açıqlanacaq.
