"Qarabağ"ın vitse-prezidenti Tahir Gözəlin UEFA-nın yarışlar üzrə direktoru Corco Marketti ilə görüşünün vaxtı müəyyənləşib. Sportnet.az-ın məlumatına görə, Gözəl dekabrın 17-də İsveçrəyə yollanaraq, Marketti ilə bir araya gələcək.
Vitse-prezident Ağdam klubunun rəsmi saytına açıqlamasında deyib: "Nəticədən asılı olmayaraq futbolun ürəyi olan UEFA-ya gedəcəyəm. Orada qapalı və ya açıq görüşdə həmin epizoda onlarla birgə baxacağam və "Qarabağ"a qarşı haqsızlıq edildiyini onların dilindən eşidəcəyəm".
Qeyd edək ki, Avropa Liqasının VI turunun İtaliya "İnter"i ilə oyununun 90+4-cü dəqiqəsində təmiz qolunun sayılmaması ilə bağlı "Qarabağ" UEFA-ya şikayət məktubu ünvanlayıb. Həftəsonu olduğundan, UEFA-dan hələ ki heç bir cavab gəlməyib.
