Azərbaycan cüdoçusu Elmar Qasımov Bakıda keçirilən dünya çempionatında 1/8 final görüşünə çıxıb.
Sportnet.az-ın məlumatına görə, 100 kq çəki dərəcəsində rəqib gürcüstanlı Varlam Liparteliani olub. Əsas vaxtda qalib müəyyənləşməyib. Əlavə vaxtda isə Liparteliani ipponla qələbə qazanıb. Bununla da Qasımov dünya çempionatı ilə vidalaşıb.
-------------------
Azərbaycan cüdoçusu Elmar Qasımov Bakıda keçirilən dünya çempionatında 1/16 final görüşünə çıxıb.
Sportnet.az-ın məlumatına görə, 100 kq çəki dərəcəsində rəqib monteneqrolu Danilo Pantiç olub. Qasımov 1 dəqiqə 58 saniyəyə ipponla qalib gəlib. 1/8 finalda o, Gürcüstan təmsilçisi Varlam Liparteliani ilə qarşılaşacaq.
------------------------
Azərbaycan cüdoçusu Elmar Qasımov Bakıda keçirilən dünya çempionatına qələbə ilə başlayıb.
Sportnet.az-ın məlumatına görə, 100 kq çəki dərəcəsindəki 28 yaşlı idmançı 1/32 finala təsadüf edən ilk görüşündə isveçli Martin Paçekə 41 saniyəyə ipponla qalib gəlib. Onun 1/16 finaldakı rəqibi monteneqrolu Danilo Pantiç olacaq.
Əvəzində Zelim Kotsoyev elə isveçli Yoakim Dvarbiyə 3 dəqiqə 8 saniyəyə uduzub. O, rəqibin saxlama fəndi qarşılığında təslim olub.
--------------------
Bakıda davam edən dünya çempionatında bu gün Azərbaycanın daha iki cüdoçusu çıxış edəcək.
Sportnet.az xəbər verir ki, altıncı yarış günündə 100 kq çəki dərəcəsində Elmar Qasımovla Zelim Kotsoyev mübarizəyə qoşulacaqlar. Hər iki idmançı yarışa 1/32 final mərhələsindən başlayacaq. Onlar ilk görüşlərini isveçli cüdoçulara - müvafiq olaraq, Martin Paçek və Yoakim Dvarbiyə qarşı keçirəcəklər.
Bu gün qadınların yarışında 78 kq çəkiyə malik cüdoçular da qüvvəsini sınayacaq. Azərbaycan millisi bu çəki dərəcəsində təmsil olunmur. İlk görüşlər saat 10:00-da start götürəcək. Saat 16:00-dan etibarən isə medal qarşılaşmaları başlanacaq.
Qasımov 2016-cı il Rio-de-Janeyro Yay Olimpiya Oyunlarının və IV İslam Həmrəyliyi Oyunlarının, eləcə də 2014-cü il Avropa çempionatının gümüş, 2012-ci il qitə çempionatının və 2017-ci il dünya çempionatının bürünc medalçısıdır. 27 yaşlı idmançı Dünya Turu seriyalı yarışlarda 5 qızıl, 3 gümüş və 7 bürünc medal əldə edib. O, 2009-cu ildə Ermənistanın paytaxtı Yerevanda gənclər arasında Avropa çempionatında qızıl medal qazanaraq, Azərbaycanın dövlət himnini səsləndirib.
Kotsoyev Avropa Kubokunun qalibi, builki qitə çempionatının bürünc medalçısıdır. 20 yaşlı cüdoçu 2 dəfə Qrin-prilərdə 1-ci yeri tutub.
Qeyd edək ki, geridə qalan 5 yarış günündə Azərbaycan idmançılarından Aişə Qurbanlı (48 kq), Buyankişiq Purevsuren (52 kq), İçinxorlu Munxtsedev (57 kq), Orxan Səfərov, Kəramət Hüseynov (hər ikisi 60 kq), Nicat Şıxəlizadə (66 kq), Rüstəm Orucov, Hidayət Heydərov (hər ikisi 73 kq) və Məmmədəli Mehdiyev (90 kq) çıxışlarını başa vurublar. Onlardan yalnız Heydərov dünya çempionatının bürünc medalını qazanıb. Fərdi yarışlarda son olaraq sentyabrın 26-da İrina Kindzerska (+78 kq) və Uşangi Kokauri (+100 kq) mübarizə aparacaq.
Dünya çempionatı
100 kq
1/8 final. Elmar Qasımov - Varlam Liparteliani (Gürcüstan)
1/16 final. Elmar Qasımov - Danilo Pantiç (Monteneqro)
1/32 final. Elmar Qasımov - Martin Paçek (İsveç)
1/32 final. Zelim Kotsoyev - Yoakim Dvarbi (İsveç)
