Sambo üzrə Azərbaycan milli komandası Rusiyanın paytaxtı Moskvada Anatoli Xarlampiyevin xatirəsinə keçirilmiş Dünya Kubokunda komanda hesabına görə ikinci yeri tutub. Bu barədə Sportnet.az-a millinin baş məşqçisi Yaqub Abdullayev məlumat verib.
Onun sözlərinə görə, Azərbaycan bu pilləni 27 xalla qazanıb. Birinci yerə 37 xalla Rusiya layiq görülüb. İlk üçlüyü isə 25 xalla Qazaxıstan samboçuları qapayıb.
Azərbaycan samboçularının çıxışının Beynəlxalq Sambo Federasiyasının prezidenti Vasiliy Şestakov tərəfindən bəyənildiyini deyən Y.Abdullayev hər 3 ölkənin kubokla mükafatlandırıldığını bildirib.
Qeyd edək ki, Azərbaycan samboçuları Dünya Kubokunu 1 qızıl, 2 gümüş və 5 bürünc medalla başa vurublar.
