Ukrayna Futbol Assosiasiyası (UAF) UEFA-ya etiraz məktubu göndərib.
Sportnet.az xəbər verir ki, müraciətdə Avropa futbol qurumunun Serbiyanın paytaxtı Belqraddakı 49-cu Konqresi zamanı xatirəsi anılanlar sırasında müharibədə ölən Rusiya milli komandasının sabiq müdafiəçisi Aleksey Buqayevin də yer almasından narazılıq ifadə olunub.
"Nəzərinizə çatdırırıq ki, Rusiya Futbol İttifaqının təqdim etdiyi siyahıdakı rusiyalı sabiq futbolçu Aleksey Buqayev Rusiya ordusunun könüllüsü olub. Oxşar situasiya daha bir keçmiş futbolçu Zaur Kaziyevə də aiddir. Biz bu məsələyə baxmağı sizdən israrla xahiş edirik", - deyə UAF-ın məktubunda bildirilir.
Əvvəllər "Tom", "Torpedo", "Lokomotiv", "Krasnodar" klublarında çıxış etmiş Buqayev 43 yaşında ikən 2024-cü ilin sonlarında ölüb.
Qeyd edək ki, UEFA-nın Konqresində Azərbaycanın son bir il ərzində dünyasını dəyişmiş futbol simaları - Abdulbari Gözəl, Çingiz İsmayılov, Elbrus Məmmədov, Sədrəddin Məmmədov və Novil İsmayılovun xatirələri 1 dəqiqəlik sükutla anılıb.
