"Stadionda əsl futbol ab-havası var idi".
Sportnet.az xəbər verir ki, bunu "Qarabağ"ın baş məşqçisi Qurban Qurbanov evdə Şimali Makedoniya "Şkendiya"sına 5:1 hesabı ilə qalib gəldikləri UEFA Çempionlar Liqasının III təsnifat mərhələsinin cavab görüşündən sonra mətbuat konfransında deyib.
53 yaşlı mütəxəssis oyun barədə bunu deyib: "Daha yaxşı çalışmalı və hər mərhələdən nəticə çıxarmalıyıq".
O, rəqibi intizamlı və ali-cənab komanda adlandırıb: "Bu da mənim xoşuma gəldi. Belə böyükhesablı qələbə qazanacağımızı gözləmirdim. Futbolda hamı kimi biz də minimum epizodlardan maksimum nəticə almağa çalışırıq. Bu nəticəni istəyirdik, amma açığı, gözləmirdim".
Qurbanov matçda debüt edən Hikmət Cəbrayılzadənin daha çox çalışmalı olduğunu söyləyib: "Akademiyaya hər il 2-3 futbolçu cəlb edirik və orada onların potensialına baxırıq. Hikmət Cəbrayılzadə gəldiyi gündən çalışqanlığı ilə fərqlənib. Daha çox çalışmalıdır. Onu çempionat oyunlarında meydanda daha çox görəcəyik".
O, qol buraxdıqdan sonra qalib gəlməyin daha yaxşı olduğunu deyib: "Çünki belə olduqda futbolçular daha çox özünə inamlı olur. Amma bu oyunun mənə ‘Lex’lə matçı xatırladacağını düşünməzdim".
Baş məşqçi Sami Mmaee barədə söz açıb: "Onun futbol qabiliyyəti çox cəlbedicidir. Sami oyuna çıxdı və mən ondan istədiyim nəticəni aldım".
"Qarabağ"ın baş məşqçisi start heyət və rotasiyaların önəmliliyindən danışıb: "Bu lazımdır ki, futbolçular bir-birini tamamlaya bilsinlər. Baxmayaraq ki, Kadi oyundan çıxdı və daha sonra geri döndü, bəzi ustalıq keyfiyyətləri belə oyunlarda daha çox ön plana çıxır. Yankoviçin əsas heyətdə olması isə bizə böyük kömək oldu".
O, Premyer Liqanın I turunda keçiriləcək "Sabah"la oyunun təxirə salınmasını şərh edib: "İnanmıram ki, bu, nə mənfi, nə də müsbət təsir etsin bizə. Biz çempionat oyununa hazır idik və oynayacağıq da. "Sabah"ı gözləsək belə, iki gün sonra oynamalıyıq. "Sabah" bizi gözləsə, üçüncü gün də eyni vəziyyət olardı".
Qurbanov rəqibdə boşluğun çox olduğunu bildirib: "Amma bunu demək doğru deyil. Bizim cinahlarda sürətli futbolçularımız var. İkinci qolumuzdan sonra rəqib motivasiyasını itirdi və bu da bizim ardıcıl qollar vurmağımıza şərait yaratdı".
O, daha yaxşısını etməli olduqlarını söyləyib: "Əlimizdən gələnin ən yaxşısını etməliyik. Hələ ki, çətin vəziyyətdə tək qalmamışıq. "Araz-Naxçıvan"ın şansı olmasa da, "Sabah"ın turunu keçmək şansımız var. Tənqid normaldır, azərbaycanlıların dediyi hər söz mənim üçün qəbul olunandır və mən buna müsbət yanaşıram. Çalışırıq ki, işimizi düzgün quraq və daha yaxşı nəticə əldə edək.
Qurbanov Azərbaycan meydançalarının durumu barədə bunu deyib: "Başqa ölkələrin çempionat oyunlarında belə atmosfer olur və bu futbolçulara çox yaxşı təsir edir, onların həvəsini artırır. Bu il üç komandamız Şamaxıda oynayacaqsa, bu bizim üçün çox pis haldır. Süni ot örtüyündə oynamaq zədə riskini artırır.
Avroliqadan və Çempionlar Liqasından sonra gəlib zəif işıqlı, süni meydançalarda oynamaq futbolçular üçün yaxşı deyil. Bu, onların əsəblərinə və motivasiyasına mənfi təsir edir. Əlimizdən gələni edəcəyik ki, futbolçularımız çempionatda motivasiyasını itirməsin.
AFFA İcraiyyə Komitəsində ot örtüyü məsələsini qaldırmağa ehtiyac yoxdur, çünki bu məsələ hər dəfə gündəmə gəlir. Hər komandaya bir il vaxt verilir və gələn il də eyni vəziyyət yaranarsa, o zaman ciddi tədbirlər görüləcək. Dediyim kimi, bəzən müəyyən səviyyəyə çatmaq üçün çətinlikləri aşmaq lazımdır".
