"Futbolçularımı təbrik edirəm. Biz çox böyük iş görmüşük. Bu işin nəticəsi bu gün qazandığımız qələbədir".
Sportnet.az-ın məlumatına görə, bunu "İmişli"nin baş məşqçisi Jorj Kaşkilya səfərdə "Sabah"a 1:0 hesabı ilə qalib gəldikləri Azərbaycan Premyer Liqasının III tur matçından sonra mətbuat konfransında deyib.
"İlk hissə çox çətin oldu. İlk dəqiqələrdən "Sabah" pressinq tətbiq etdi. Lakin biz bunun qarşısını ala bildik. 2-ci hissədə tamam fərqli oyun gördük. Bizim əks-hücuma çıxmağa çox şanslarımız oldu və nəticədə qalib gəldik", - portuqaliyalı mütəxəssis vurğulayıb.
Onun sözlərinə görə, "Sabah" çox təhlükəli komandadır: "Biz qol vurduqdan sonra daha rahat oynamağa başladıq. Qalibiyyəti hiss edərək daha motivasiyalı olmağa çalışdıq".
Kaşkilya milli fasilə müddətində yoxlama oyunu keçirəcəklərini diqqətə çatdırıb: "Fasilədən maksimum yararlanaraq I Liqa komandası ilə yoxlama matçı keçirmək istəyirik. Oyunun detalları barədə daha sonra paylaşım ediləcək".
