"Qəbələ”nin əvəzedici komandasının baş məşqçisi Ramin Quliyevin köməkçisi və qapıçılarla işləyən məşqçisi müəyyənləşib. Sportnet.az-ın klubun rəsmi saytına istinadən məlumatına görə, bu vəzifələri müvafiq olaraq, Elmar Baxşıyev və Vüqar Məmmədov icra edəcək.
"Qırmızı-qaralar”ın sabiq futbolçusu olan Baxşıyev komandanın məşqçilər korpusuna yeni təyin olunub. Məşqçilik karyerasına "Neftçi”nin U-19 komandasında başlayan 35 yaşlı sabiq yarımmüdafiəçi "Qəbələ”nin əvəzedicilərinin məşqçisi kimi fəaliyyət göstərəcək. Futbolçu karyerasını "qırmızı-qara” formada bitirən Baxşıyev 2012-ci ilin əvvəlində gəldiyi "Qəbələ"də 28 matç keçirib. Bu oyunlardan 9-u 2011/12, 19-u 2012/13 mövsümünə təsadüf edib. O, bütün qarşılaşmaları Premyer Liqa çərçivəsində keçirib. Bunadək isə yarımmüdafiəçi "Şəfa” (1997-1999), "İnter” (1999-2007), "Xəzər Lənkəran” (2007-2008) və "Neftçi”nin (2008-2011) şərəfini qoruyub. Baxşıyev Premyer Liqada 268 matçda 9 qol vurub. 2004-2009-cu illərdə Azərbaycan millisinin formasını geyən orta sahə oyunçusu 32 qarşılaşmada iştirak edib.
2005-ci ildən "Qəbələ”də çalışan Məmmədov isə əvəzedici komandada fəaliyyətini davam etdirəcək. 2013-cü ilin yayından əvəzedici komandada işləyən mütəxəssis postunda qalıb. Futbolçu kimi "Kəpəz” (1985-1987, 1990-1995, 1996-2001), Bakı MOİK-i (1987-1990) və "Şəmkir” (1995-1996) klublarında çıxış edən 46 yaşlı Məmmədov 1994/1995 mövsümündə Azərbaycan çempionu, 1993/1994 mövsümündə kuboku qazanıb.
