Bu gün "Qarabağ" tarixində ilk dəfə UEFA Çempionlar Liqasının pley-off matçına çıxacaq.
Sportnet.az xəbər verir ki, 1/8 finala vəsiqə uğrunda görüşdə rəqib İngiltərə "Nyukasl"ı olacaq.
Tofiq Bəhramov adına Respublika stadionunda Bakı vaxtı ilə saat 21:45-də başlanacaq oyunu norveçli baş hakim Espen Eskas idarə edəcək.
Əsas mərhələdə "Qarabağ" 10 xalla (3 qələbə, 1 heç-heçə, 4 məğlubiyyət) 22-ci, "Nyukasl" 14 xalla (4 qələbə, 2 heç-heçə, 2 məğlubiyyət) 12-ci yeri tutub.
Bu, iki komandanın ilk görüşü və "Nyukasl"ın Azərbaycan komandasına qarşı birinci oyunudur. "Qarabağ" İngiltərədən olan rəqibləri ilə 9 görüşün heç-birində qələbə qazana bilməyib və meydanı 1 heç-heçə, 8 məğlubiyyətlə tərk edib.
"Qarabağ" Çempionlar Liqasında ikinci, "Nyukasl" dördüncü dəfə iştirak edir. Hər iki komanda pley-offa ilk dəfə çıxır. İki mövsüm əvvəl Eddi Haunun baş məşqçi olduğu kollektiv qrupda 5 xalla 4-cü yeri tutub.
“Qarabağ” avrokuboklarda son 10 iki oyundan ibarət qarşılaşmanın 8-də qalib gəlib. Ağdam təmsilçisi cari mövsümdə avrokuboklarda keçirdiyi 7 ev matçının 4-də qələbə qazanıb, 1 heç-heçə edib və 2 dəfə məğlub olub. Qurban Qurbanovun komandası son 6 ev oyununda hər dəfə ən azı iki qol vurmağı bacarıb.
Bu mövsüm "Qarabağ" İngiltərə təmsilçilərindən "Çelsi" ilə evdə 2:2 hesablı heç-heçə edib və səfərdə "Liverpul"a uduzub - 6:0.
Hücum xəttində isə Kamilo Duran diqqət çəkir. O, “Qarabağ”ın Çempionlar Liqasında keçirdiyi son iki ev matçında hesabı açan futbolçu olub.
“Nyukasl” isə Çempionlar Liqasının pley-off mərhələsində çıxış edən 10-cu İngiltərə klubudur. “Sağsağanlar” sonuncu dəfə 2012/2013 mövsümündə avrokubokların pley-off mərhələsində oynayıb və həmin vaxt Avropa Liqasında 1/4 finala qədər irəliləyib.
İngiltərə təmsilçisi turnirin son qalibi Fransa PSJ-si ilə 1:1 hesablı heç-heçə etdikdən sonra axırıncı 7 oyunun yalnız birində məğlub olub (4 qələbə, 2 heç-heçə). Bununla belə, komandanın avrokuboklardakı səfər statistikası zəifdir – son 15 oyunun cəmi 2-də qalib gəlib (8 heç-heçə, 5 məğlubiyyət). Lakin cari mövsüm keçirdiyi 4 səfər görüşündə yalnız bir dəfə uduzub.
Komandanın əsas qol silahlarından olan Entoni Qordon bu mövsüm 6 dəfə fərqlənib. O, “Nyukasl”ın Çempionlar Liqası tarixində ən məhsuldar oyunçularından biridir və 6 qolla klub əfsanəsi Alan Şirer ilə eyni göstəriciyə malikdir. Qordon komanda yoldaşı Harvi Barnsdan isə bir qol öndədir.
UEFA Çempionlar Liqası
Pley-off mərhələsi, ilk oyun
18 fevral
21:45. "Qarabağ" (Azərbaycan) - "Nyukasl" (İngiltərə)
Baş hakim: Espen Eskas
Yan xətt hakimləri: Yan Erik Enqan, İsaak Elias Başevkin
Dördüncü hakim: Siqurd Krinqstad (hamısı Norveç)
VAR: Rob Diperink
VAR köməkçisi: Dennis Hiqler (hər ikisi Niderland)
Hakim-inspektor: Matteo Simone Trefoloni (İtaliya)
UEFA nümayəndəsi: İqnas Marsinkeviçyus (Litva)
Qeyd edək ki, cavab görüşü fevralın 24-də keçiriləcək.
