"Bütün komanda inanır ki, ilk ev oyunumuzda tribunalara xeyli azarkeş toplaşacaq. Fanatların stadionu dolduracağına və bizə dəstək olacaqlarına ümidimiz böyükdür. Yerli azarkeşlər önündə ilk sınaqdan üzüağ çıxmağa çalışacağıq. Azarkeşləri sevindirməyə səy göstərəcəyik, hamını oyuna dəvət edirəm”. Sportnet.az-ın məlumatına görə, bunu "Zirə" ilə Azərbaycan Premyer Liqasının II tur matçı ərəfəsində "Kəpəz"in futbolçusu Kərim Diniyev klubun mətbuat xidmətinə açıqlamasında deyib.
Gənc yarımmüdafiəçi uğura aparan yolda azarkeşlərin həm də böyük qüvvə olduğunu bildirib: "Komandanın qələbə qazanmasında onların da böyük rolu var. Azarkeşlər bizim 12-ci oyunçumuzdur. Fanatların dəstəyi sayəsində oyunlara daha yaxşı motivasiya olunuruq, meydana uğur qazanmaq üçün çıxırıq”.
"Kəpəz”in baş məşqçisi Şahin Diniyev vaxtilə Nizami yurdunun təmsilçisinin şərəfini qoruyub. İndi onun oğlu Kərim də eyni yolu tutub. Ata-oğul "sarı-göylər”in uğuru üçün birlikdə çalışır: "Belə bir köklü, titullu komandanın heyətində olduğum üçün fəxr edirəm, sevinc hissi keçirirəm. İlk dəfədir ki, atamın başçılığı altında peşəkar səviyyədə oynayıram. Düzdür, vaxtilə "Terek”in əvəzedici heyətində çıxış etmişəm. Amma əsas komandada bu ilkdir”.
Qeyd edək ki, avqustun 16-da Gəncə şəhər stadionunda keçiriləcək "Kəpəz" - "Zirə" matçı saat 18:30-da başlanacaq.
