Avropa Liqasının qrup mərhələsinin III turunun oyununda "Qəbələ" və Almaniyanın "Borussiya" (Dortmund) komandaları arasında keçiriləcək görüşdən öncə təşkil olunacaq mətbuat konfransı və açıq məşqlərin vaxtı müəyyənləşib. Sportnet.az-ın məlumatına görə, oktyabrın 21-də ilk olaraq meydan sahiblərinin baş məşqçisi Roman Qriqorçuk jurnalistlərin suallarını cavablandıracaq.
O, saat 18:45-də oyunun keçiriləcəyi "Bakcell Arena"nın Media zalında olacaq. Saat 19:30-də isə "qırmızı-qaralar" oynöncəsi son məşqini keçəcək.
Saat 21:00-da isə "Borussiya"nın çalışdırıcısı Tomas Tuxel media nümayəndələrinin suallarını cavablandıracaq. Almaniya təmsilçisinin son məşqi konfransdan yarım saat sonra baş tutacaq.
