AFFA Hakimlər Komitəsinin sədri Xaqani Məmmədovun Sportnet.az-a müsahibəsi
- FİFA referisi Əliyar Ağayev avrokubokların qrup mərhələsində oyun idarə edəcək. Bu Azərbaycanın futbol hakimliyi tarixində ilk olacaq...
- Bəli, belə hal ilk dəfədir. Bizə göndərilən məlumatda bildirilib ki, təyinat ya Çempionlar Liqası, ya da Avropa Liqasına olacaq. Hələ qrup oyunlarıdır və təyinat da bu mərhələdə reallaşacaq.
- Əliyar Ağayevin köməkçiləri müəyyənləşib?
- Əliyarla birgə 6 nəfər olmalıdır. Artıq onlardan ikisi məlumdur. Bunlar FİFA referilərimiz Orxan Məmmədov və Rəhim Həsənovdur. İlk dəfə belə təyinat olduğundan hamısı FİFA referiləri olacaq. Ancaq ola bilsin ki, 4-cü hakim milli hakimlərimizdən olsun. Əsasən ingilis dilini bilənlərə üstünlük veriləcək. Çünki bu, elə-belə oyun deyil. Üstəlik seçimləri baş hakimin istəyinə uyğun edəcəyik. Kiminlə işləmək ona rahatdırsa, Komitə ilə birgə seçim edəcəyik.
- Bəs digər hakimlər?
- Ehtiyat hakim kimi bir neçə nəfərin namizədliyi var. Onlar da Premyer Liqada oyun idarə edən hakimlər olacaq.
- Xaqani Məmmədova nə vaxt belə təyinat gələcək?
- Mətbuatda yazırlar ki, guya mən müraciət etmişəm, amma qəbul olunmayıb. Əslində belə bir şey yoxdur. Çünki mən bununla bağlı müraciət etməmişəm.
- Qış fasiləsinə az qalıb. Toplanışın yeri, zamanı və kimlərin iştirak edəcəyi dəqiqləşib?
- Güman ki, toplanış həmişə olduğu kimi Türkiyənin Antalya şəhərində olacaq. Hakimlərin sayı və kimliyi məlum deyil. Ola bilsin ki, qarşıdakı turlarda kimsə özünü pis aparsın. Toplanışda adətən bir neçə gənc hakim və mövsümün ilk yarısında oyun idarə edənlər iştirak edir. Hər toplanışda 2-3 gənc hakimə yer veririk. Onlarda bu sınağı uğurla keçəni də, keçməyəni də olur.
- Artıq FİFA referiliyi ilə bağlı siyahı təqdim olunub. Həmin siyahıda kimlərin adı var?
- Ötən ilki siyahı ilə eynidir. Heç bir dəyişiklik etməmişik. Sadəcə bir nəfər futzal hakiminin adını siyahıya əlavə etmişik ki, o da Fərid İslamovdur.
