Almaniyanın "Bavariya" klubunun baş məşqçisi Xosep Qvardiola və onun İspaniya "Barselona"sı və Çili yığmasındakı həmkarları Luis Enrike ilə Xorxe Sampaoli ilin məşqçisi adına namizəddirlər. Sportnet.az-ın məlumatına görə, bu barədə FİFA-nın yaydığı açıqlamada bildirilir.
Ən yaxşı qol üçün nəzərdə tutulan Ferents Puşkaş mükafatına namizədlər siyahısına isə Lionel Messi ("Atletik" - "Barselona", 30 may, İspaniya Kuboku), Uendell Lira ("Atletiko QO" - "Qoyaneziya", 15 mart, Braziliya çempionatı), Alessandro Florentsi ("Roma" - "Barselona", 16 sentyabr, Çempionlar Liqası) düşüb. Ötən il bu mükafat "Real Madrid" və Kolumbiya yığmasının yarımmüdafiəçisi Xames Rodrigesə qismət olub.
"Qızıl top", eləcə də ən yaxşı baş məşqçi və ən gözəl qol sahibinin mükafatlandırma mərasimi 11 yanvar 2016-cı ildə İsveçrənin Sürix şəhərində keçiriləcək.
