"Rəvan" klubu ilə keçirdiyi Azərbaycan Premyer Liqasının XXI tur matçında "Zirə"nin futbolçuları arasında insident baş verib. Sportnet.az-ın məlumatına görə, xoşagəlməz olay 17-ci dəqiqədə Viktor İqbekoyi ilə Yovan Krneta arasında yaşanıb.
Səbəb İqbekoyinin "Zirə"nin cərimə meydançası önündə topu itirməsi olub. Bu zaman "Rəvan"ın futbolçusu Nuran Qurbanov topu ələ keçirərək, Ceyhun Abdullayevə ötürüb. Abdullayevin zərbəsi qapıdan azacıq aralı keçib. Təhlükə sovuşduqdan sonra Krneta İqbekoyiyə yol verdiyi səhvə görə irad tutub. Əvəzində nigeriyalı yarımmüdafiəçi serbiyalı müdafiəçiyə sərt cavab verərək, onun üzərinə yeriyib. Araya girən baş hakim İnqilab Məmmədov onları yanına çağırıb və şifahi xəbərdarlıq edib.
Qeyd edək ki, oyun "Zirə"nin qələbəsi ilə yekunlaşıb - 2:1.
