"Qarşıdakı oyuna hazırlığımız həmişə olduğu kimi yüksək səviyyədə keçib. Xüsusi bir məşq planı olmayıb. Digər görüşlərə necə hazırlaşmışıqsa, elə də məşq etmişik". Sportnet.az-ın məlumatına görə, bunu "Kəpəz"in futbolçusu klubun rəsmi saytına açıqlamasında deyib.
Azərbaycan Premyer Liqasının XXII turunda səfərdə "İnter"lə keçiriləcək oyun haqda danışan 23 yaşlı hücumçu Bakı təmsilçisi ilə görüşün çətin keçəcəyini bildirib. O, çempionatda asan oyun və ya zəif rəqib anlayışının olmadığını söyləyib: "Hədəfimiz bəllidir – qələbə qazanmaq istəyirik. Gərgin oyun olacaq. "İnter" kifayət qədər ciddi və güclü rəqibdir. Komandanın turnir cədvəlindəki yeri də gücündən xəbər verir. Rəqibin heyətində çox təhlükəli yerli və əcnəbi futbolçular var. Ona görə qarşıda bizi asan oyunun gözləmədiyini söyləyə bilərəm".
Rzayevin sözlərinə görə, "Kəpəz" öz oyununu nümayiş etdirə bilsə, "İnter"lə görüşdə arzuladığı nəticəni qazana biləcək: "Əvvəlki turlarda göstərdiyimiz oyunu sərgiləyə bilsək, qalib gələcəyik. Çempionatda öz oyunumuzla digərlərindən geri qalmadığımızı göstərmişik. Məncə, Premyer Liqada ən yaxşı, baxımlı və rəngarəng futbol nümayiş etdirən komandalardan biri elə "Kəpəz"dir. Qış fasiləsindən sonra "Qəbələ", AZAL və "Qarabağ"la oyunlarda necə mübarizə apardığımızı hamı gördü. Sonuncu görüşün ilk 15 dəqiqəsini çıxmaq şərtilə Ağdam klubu ilə başa-baş oynadıq. "Qarabağ"la matçın ədalətli nəticəsi də, heç-heçə idi".
