Azərbaycan Premyer Liqasında qarşıdakı 23-cü turun oyunları bir gündə keçiriləcək. Sportnet.az-ın məlumatına görə, buna əsas səbəb artıq növbəti həftənin çərşənbə günü Azərbaycan kuboku uğrunda 1/8 final mərhələsinin ilk matçlarının keçiriləcəyidir.
Bu üzdən kubok iştirakçılarına həmin oyunlara hazırlaşmaq üçün vaxt baxımından imkan yaradııb.
Turun mərkəzi oyunu "İnter” – "Qarabağ” sayılır. Bu görüş son 2 çempionatın ən güclülərinin – qızıl və gümüş medalçılarının mübarizəsi olacaq. Düzdür, ardıcıl 2 mövsümdür 2-ci olan "İnter” cari mövsümdə həminki kimi iddialı deyil. Təsadüfi deyil ki, "bankirlər” qış fasiləsindən sonra ilk qələbələrini yalnız son turda qazana biliblər. "Qarabağ” hazırda 13 xal qabaqladığı "İnter”ə cari mövsümdə hər 2 oyunda nəinki qalib gəlib, ondan qol da buraxmayıb. Bu matç Vüqar Nadirov üçün prinsipial əhəmiyyət daşıyacaq. Axı Nadirov əslən Ağdamdandır, "Qarabağ”ın yetirməsidir və uzun müddət onun şərəfini qoruyub. O, 2016-cı ildən çıxış etdiyi "bankirlər”də hələ qol hesabını açmayıb.
"Zirə” – "Neftçi” matçı da mərkəzi oyuna layiq bir dueldir. Ardıcıl 3 ev oyunundan sonra dalbadal 2-ci səfər matçına çıxacaq "Neftçi” adına görə favorit sayıla bilər. Ancaq əslində, "ağ-qaralar”ı Zirədə çətin sınaq gözləyir. Əvvəla, Əsgər Abdullayevin yetirmələri qış fasiləsindən sonra 100 faiz nəticə göstərən - 4 oyuna 4 qələbə qazanan yeganı komandaya rəqib olacaq. Üstəlik, "Neftçi” "Zirə”yə cari mövsümdə qalib gələ bilməyib. Samir Əliyevin baş məşqçiliyi dövründə səfərdə 0:2 hesablı məğlubiyyət qeydə alındısa, Əsgər Abdullayevin vaxtında evdə yalnız 1 xal əldə etmək mümkün oldu. Rəqibindən 10 xal geridə qalan "Neftçi” fasilədən sonra bir oyundan qalib gəlirsə, növbətidə mütləq xal itirir. Həmin ardıcıllıqla bu dəfə qələbə olmalıdır və buna böyük zərurət var. Hər halda, növbəti xal itkisi "ağ-qaralar”ı avrokuboklar zonasından bir qədər də uzaqlaşdıracaq.
Paytaxtdakı 3-cü matç yuxarıda bəhs etdiyimiz 2 matçın kölgəsində qalır. AZAL-la "Rəvan”ın cari mövsümdəki görüşləri qol baxımından çox kasad alınıb – 2 oyuna cəmi 1 qol. "Təyyarəçilər” həmin qolla bu çempionatda ilk qələbəsini məhz "Rəvan” üzərində qazanıb. AZAL bu il qələbə üzünə həsrət qalan rəqibini yenidən Şüvəlanda qonaq edəcək.
Əyalətdəki matçlarda meydan sahibləri autsayderləri qəbul edəcək. "Qəbələ” ilk dövrədə darmadağın etdiyi "Xəzər Lənkəran” ilə yenidən Qəbələdə görüşəcək. Həmin 6:0 cari çempionatın ən böyükhesablı qələbəsi və ən məhsuldar oyunudur. Roman Qriqorçukun komandası Premyer Liqadakı rəqiblərindən yalnız cənub klubu ilə matçlarda yüzfaizli nəticəyə malikdir.
"Zirə” ilə "Neftçi”nin görüşündə hər dəfə 2 qol vurulursa, "Kəpəz” – "Sumqayıt”la duelləri daha məhsuldar alınır – hərəsində 4 qol. Sumqayıtlılar üçün bu çempionatda Gəncəyə ilk səfər uğursuz oldu. Belə ki, komanda uduzmaqla yanaşı, baş məşqçisi Aqil Məmmədov istefa verdi. Onu əvəzləyən Samir Abasov "Kəpəz”lə ev oyununda qələbəyə çox yaxın olsa da, rəqibin kapitanı Tural Axundov 90+5-ci dəqiqədə penaltidən komandasını məğlubiyyətdən xilas etmişdi. "Kəpəz” ardıcıl 2 oyundur məğlub olduğundan uğursuz seriyasına qələbəylə son qoymağa çalışacaq. "Sumqayıt” isə bu il ilk qələbəsini, ilk xallarını, ilk qollarını ötən turda reallaşdıra bilib.
27 fevral
14:00. "Kəpəz” – "Sumqayıt”
Hakimlər: Əliyar Ağayev, Rza Məmmədov, Kamran Bayramov, Mahir Məmmədov
Gəncə. Şəhər stadionu
Mövsümün ilk yarısındakı oyunlar – 3:1, 2:2
15:00. "Zirə” – "Neftçi”
Hakimlər: Fariz Yusifov, Munis Abdullayev, Elman Musayev, Ramil Əhmədov
Bakı. Zirə İdman Kompleksinin stadionu
Mövsümün ilk yarısındakı oyunlar – 2:0, 1:1
15:00. AZAL – "Rəvan”
Hakimlər: Rauf Cabbarov, Coşqun Həsənov, Nahid Əliyev, Xəlil Xəlilov
Bakı. "AZAL Arena” stadionu
Mövsümün ilk yarısındakı oyunlar – 1:0, 0:0
17:00. "Qəbələ” – "Xəzər Lənkəran”
Hakimlər: Rəvan Həmzəzadə, Yaşar Abbasov, İsgəndər Əliyev, Elvin Əsgərov
Qəbələ. Şəhər stadionu
Mövsümün ilk yarısındakı oyunlar – 6:0, 1:0
18:00. "İnter” – "Qarabağ”
Hakimlər: Ömər Paşayev, Namiq Hüseynov, Vaqif Musayev, Ramil Diniyev
Bakı. "İnter Arena” stadionu
Mövsümün ilk yarısındakı oyunlar – 0:2, 0:1
Mehman SÜLEYMANOV
