Yeni aksiyaya start verən "Qəbələ" klubu eyniadlı şəhərdə yerləşən məktəblərin qonağı olub. Sportnet.az-ın məlumatına görə, aksiya çərçivəsində klubun sifarişi ilə hazırlanan məktəb ləvazimatları dəstləri şagirdlərə təqdim edilir.
Klubun idman direktoru Toni Adams, baş menecer Zaur Əzizov, Marketinq və Media şöbəsinin rəhbəri Səməd Nəsibov və kommersiya direktoru Mustafa Aztopalın iştirakı ilə rayonun 1 saylı orta məktəbində şagirdlərlə görüş keçirilib. Görüş zamanı onlara məktəbli ləvazimatları paylanılıb. Bundan başqa Zaur Əzizov çıxış edərək məktəbliləri klubun ev oyunlarına dəvət edib.
Qəbələdə yerləşən 68 məktəbdə təhsil alan 17 min şagirdi əhatə edən bu sosial aksiyanın məqsədi şagirdlərin idmana - futbola olan marağını artırmaq, idmanı təhsil vasitələri ilə - təhsildən ayrılmadan sevdirmək, onların "Qəbələ" ailəsinin bir üzvü olduğunu, klub üçün, gələcək üçün önəm daşıdıqlarını göstərməkdədir.
Artıq bütün kənd məktəblərində ləvazimatlar paylanılıb. Aksiyanın davamı olaraq klubun nümayəndələri mayın sonunadək Qəbələdəki bütün orta məktəbləri ziyarət edəcək. Üstəlik şagirdlərin oyunları izləməsi üçün hər cür şərait yaradılacaq.
