Ukraynanın "Olimpik" (Donets) klubunun sabiq futbolçusu İsa Şerif "Qəbələ"də baxışdadır. Sportnet.az-ın Ukrayna mətbuatına istinadən verdiyi məlumata görə, 25 yaşlı yarımmüdafiəçi Azərbaycan klubu ilə müqavilə imzalamağa gəlib.
Onun keçidi azad agent kimi gerçəkləşəcək. Bu halda, baş məşqçi Roman Qriqorçuk Ukrayna çempionatında çıxış etmiş 10-cu futbolçunu hazırkı komandasına cəlb edəcək.
"Qəbələ"nin meneceri Səbuhi Səfiyarlı "Report"a açıqlamasında İ.Şerifin hazırda baxışda olduğunu bildirib. Onun sözlərinə görə, hələ müqavilə ilə bağlı qərar verilməyib. Yaxın günlərdə məsələ dəqiqləşəcək".
Şerif yanvarda Qazaxıstanın "Kayrat" klubunun düşərgəsinə yollansa da, baxışdan keçə bilməyib. Baş məşqçi Aleksandr Borodyuk onunla müqavilə imzalamamağı qərara alıb. Sonrada o, Ukrayna "Zarya"sı ilə danışıqlar aparsa da, anlaşma əldə olunmayıb.
Qeyd edək ki, futbolçunun "Olimpik"lə müqaviləsi ötən ilin dekabrında başa çatıb.
