"Qəbələ"nin yeni futbolçusu Pavol Farkaş Hollandiya toplanışı çərçivəsində "Arnem"lə keçirilən və təmsilçimizin 4:0 hesabı ilə qalib gəldiyi oyundan sonra fikirlərini bildirib. Sportnet.az-ın məlumatına görə, slovakiyalı müdafiəçi klubun rəsmi saytına açıqlamasında bu görüşün onun üçün əlamətdar olduğunu söyləyib.
29 yaşlı oyunçu deyib: "Hollandiyada ilk oyunumuzu keçirdik. Bu mənim üçün "Qəbələ"nin heyətində ilk oyunum kimi əlamətdar oldu. Komandamızda yeni futbolçular çoxdur. Meydançada bir-birimizi anlamağa, uyğunlaşmağa çalışırıq".
"Qəbələ" toplanış çərçivəsində daha 3 oyun keçirəcək. Farkaş bildirib ki, bu oyunlarda problemləri görəcək və onları Premyer Liqanın startına kimi aradan qaldırmağa çalışacaqlar: "Hazırlıq prosesinin sonunadək komplektləşmiş komanda olacağıq. Məşqlərimiz çox ciddi və maraqlı keçir. Hamı həvəslidir. Çempionata yaxşı başlamaq istəyirik. Çünki yaxşı başlanğıc gözəl nəticələrin davam etməsi üçün çox vacibdir. İnanıram ki, komanda olaraq bizdən gözlənənləri verə biləcəyik".
Qeyd edək ki, Pavol Farkaş iyulun əvvəllərində "Qəbələ" ilə bir illik müqavilə imzalayıb.
